Kandiq: Hetimi për “trafik organesh” përfundoi te disa gra moldave, pa lidhje me luftën

Pretendimi i cili dikur u shndërrua në një nga akuzat më të rënda të hedhura ndaj luftës në Kosovë, ai për një trafik organesh njerëzore, është zbehur edhe një herë, këtë radhë nga një zë që vjen nga Beogradi. Aktivistja serbe Natasha Kandiq, drejtuese e Fondit për të Drejtën Humanitare, ka shkruar në profilin e saj në rrjetin “X” se hetimi për këtë çështje përfundoi te disa gra moldave, të cilat, sipas saj, nuk kanë asnjë lidhje me luftën në Kosovë.

“Hetimi për trafikimin e organeve njerëzore ka arritur te disa gra moldave dhe ato nuk kanë lidhje me luftën në Kosovë. Nuk kishte prova për një padi”, ka shkruar Kandiq.

Pretendimet për “trafik organesh” u ngritën fillimisht nga ish-senatori zviceran Dick Marty dhe shërbyen si një nga arsyet për të cilat u nis themelimi i Gjykatës Speciale. Një pretendim i tillë nuk është vërtetuar asnjëherë dhe nuk figuron as në aktakuzën e Speciales.

Deklarata e Kandiqit, që për vite me radhë ka qenë një ndër dokumentueset më të njohura të krimeve të luftës në ish-Jugosllavi, i shtohet mungesës së çdo prove gjyqësore për një nga historitë më të përfolura të pasluftës në Kosovë.