Kancelari austriak në Mal të Zi: hiqni roamingun dhe pengesat për paratë e Ballkanit

Thirrja për më shumë Evropë në Ballkan erdhi këtë herë nga Vjena. Në Samitin e Procesit të Berlinit, që po mbahet në Mal të Zi, kancelari austriak Christian Stöcker kërkoi pranimin e shpejtë të shteteve të Ballkanit Perëndimor në Bashkimin Evropian, si dhe heqjen e roamingut dhe të pengesave që rëndojnë transfertat e parave drejt rajonit.

Stöcker e lidhi kërkesën drejtpërdrejt me vendin e tij, ku jeton një komunitet i madh me prejardhje ballkanike. "Kjo do t’u sillte dobi edhe shumë njerëzve në Austri. Më shumë se 500 mijë persona në Austri kanë rrënjë ose familje në Ballkanin Perëndimor. Komunikimi i tyre duhet të bëhet më i lehtë dhe më i lirë", tha ai.

Kancelari ngriti edhe çështjen e trajtimit të pabarabartë. "Është e pashpjegueshme pse gjashtë shtetet e Ballkanit Perëndimor duhet të jenë në një pozitë më të keqe se Ukraina apo Moldavia."

Në planin financiar, Stöcker kërkoi që të gjashtë shtetet e rajonit t'i bashkohen sa më shpejt Zonës së Përbashkët të Pagesave në Euro (SEPA), me synimin që pagesat dhe transfertat ndërkufitare të bëhen më të thjeshta.

Po nga samiti në Mal të Zi, ai njoftoi se Austria do ta marrë presidencën e Procesit të Berlinit në vitin 2027. Në kuadër të këtij procesi, shtetet evropiane punojnë për t'i afruar me BE-në Shqipërinë, Bosnjën dhe Hercegovinën, Kosovën, Malin e Zi, Maqedoninë e Veriut dhe Serbinë.

"Qëllimi kryesor i Austrisë është të bashkojë të rinjtë përtej kufijve, të kapërcejë konfliktet e vjetra dhe të forcojë bashkëpunimin midis shteteve të Ballkanit", deklaroi Stöcker. Sipas tij, brezi i ardhshëm ka nevojë për një perspektivë të qartë evropiane.