Kanadaja dënon “pushtimin e paligjshëm” izraelit të Libanit dhe premton mbi 50 milionë dollarë ndihmë

Kanadaja rriti ndihmën e saj për Libanin në më shumë se 50 milionë dollarë për këtë vit dhe dënoi hapur atë që quajti “pushtim të paligjshëm” të vendit nga Izraeli, gjatë një vizite të sekretarit të shtetit për zhvillim ndërkombëtar, Randeep Sarai.

Sarai u shpreh se Bejruti duhet të qeverisë hapësirën e vet dhe njoftoi programe të reja që Otava po nis për të mbështetur familjet libaneze të prekura nga konflikti. “Angazhimi ynë është afatgjatë dhe ne jemi pranë Libanit”, tha ai. Gjatë vizitës, zyrtari kanadez pa nga afër strehimoret ku janë vendosur njerëz të zhvendosur nga lufta, si dhe refugjatë sirianë.

Pozicioni i Otavës nuk është i ri. Në kulmin e përshkallëzimit mes Izraelit dhe Libanit në mars, Kanadaja paralajmëroi më 25 mars se sovraniteti dhe integriteti territorial i Libanit “nuk duhet të cenohen”, duke dënuar ashpër planet e forcave izraelite për të pushtuar jugun e vendit.

Situata në terren mbetet e ngërçuar. Në kuadër të marrëveshjes-kornizë të ndërmjetësuar nga Shtetet e Bashkuara dhe të nënshkruar në fund të qershorit, u konceptuan “zona pilot” për t’i rikthyer ushtrisë libaneze zona të vogla në jug të vendit të kontrolluara nga forcat izraelite. Por në fund të korrikut, Forcat e Armatosura Libaneze akuzuan Izraelin se po pengonte përpjekjet e tyre për të marrë kontrollin e sigurisë në jug.

Bilanci i luftës është i rëndë: mbi 4.000 njerëz të vrarë dhe shkatërrime të gjera në gjithë Libanin. Sipas Kombeve të Bashkuara, rreth 360.000 persona janë zhvendosur si pasojë e konfliktit të fundit. Sarai tha se në dhjetë vitet e fundit Kanadaja i ka dhënë Libanit rreth 575 milionë dollarë ndihmë.

Zyrtari kanadez u takua gjithashtu me presidentin libanez Joseph Aoun dhe kryeministrin Nawaf Salam, të cilët premtuan të rivendosin autoritetin shtetëror në të gjithë vendin dhe të zbatojnë reforma për të luftuar korrupsionin.

Nga ana e tyre, zyrtarët izraelitë kanë deklaruar se nuk do të tërhiqen nga Libani derisa Hezbollahu të çarmatoset.