Kamerat inteligjente kapin në kohë zjarrin pyjor pranë fshatit Nikushtak

Një zjarr në territorin e fshatit Nikushtak, në Komunën e Likovës, është detektuar në kohë falë sistemit me kamera inteligjente për detektimin e hershëm të zjarreve pyjore, të instaluar pranë Qendrës për Menaxhim me Kriza (QMK).

Sipas njoftimit të QMK-së, menjëherë pas alarmit u vunë në lëvizje Njësia Territoriale Kundër Zjarrit në Kumanovë dhe Ndërmarrja Publike „Pyjet Kombëtare“ – Kumanovë, për të ndërmarrë masat përkatëse dhe për të ndërhyrë në terren.

"Përmes sistemit për detektimin e hershëm të zjarreve pyjore me kamera inteligjente, të instaluar në Qendrën për Menaxhim me Kriza, në kohë është detektuar një zjarr në territorin e fsh. Nikushtak, Komuna e Likovës. Pas detektimit të zjarrit, menjëherë janë njoftuar Njësia Territoriale Kundër Zjarrit në Kumanovë dhe Ndërmarrja Publike „Pyjet Kombëtare“ – Kumanovë, me qëllim ndërmarrjen e masave përkatëse dhe intervenimin në terren", theksohet në njoftim.

Drejtori i Qendrës për Menaxhim me Kriza, Muhamed Ali, shpjegoi se teknologjia u lejon operatorëve të ndjekin zjarrin pa ndërprerje. "Sistemi për detektimin e hershëm u mundëson operatorëve në Sektorin për Operacione dhe Koordinim pranë QMK-së të kontrollojnë dhe drejtojnë kamerën, duke mundësuar që gjendja me zjarrin të monitorohet vazhdimisht në mënyrë vizuale dhe në kohë reale. Në këtë mënyrë, paralelisht me monitorimin e zjarrit, mundësohet edhe koordinimi dhe drejtimi në kohë i resurseve në dispozicion në terren, si dhe përcaktimi i drejtimit të përhapjes së zjarrit, deri në lokalizimin dhe shuarjen e plotë të tij", tha Ali.

Sipas QMK-së, sistemi mundëson monitorimin e zjarrit në kohë reale dhe ndihmon në koordinimin e resurseve, si dhe në përcaktimin e drejtimit të përhapjes së zjarrit deri në lokalizimin dhe shuarjen e tij.