Kamera trupore për doganierët: 30 pajisje në Tabanoc, Qafëthanë dhe Bllacë

Doganierët në pikat kufitare Tabanoc, Qafëthanë dhe Bllacë do të punojnë nën syrin e kamerës. Pajisjet trupore do të regjistrojnë kontrollet dhe veprimet zyrtare gjatë procedurave doganore, një ndryshim që i vendos kontrolluesit njëkohësisht edhe nën kontroll.

Drejtoria e Doganave ka marrë 30 kamera trupore si donacion përmes ICITAP-it amerikan. Sipas institucionit, pajisjet synojnë rritjen e transparencës dhe të kontrollit gjatë procedurave doganore, por edhe mbrojtje shtesë për qytetarët dhe për punonjësit.

Regjistrimet nuk do të mbeten vetëm material i brendshëm: ato mund të përdoren si dëshmi dhe, kur është e nevojshme, të shkëmbehen me institucionet kompetente të zbatimit të ligjit.

Drejtori i Doganave, Boban Nikollovski, tha se sistemi i ri pritet të kontribuojë në rritjen e profesionalizmit, të përgjegjësisë dhe të sigurisë, si edhe në parandalimin e korrupsionit dhe të keqpërdorimit të autorizimeve zyrtare. Sipas tij, kamerat do të jenë veçanërisht të rëndësishme në tri pikat kufitare, ku çdo ditë kalojnë një numër i madh udhëtarësh dhe transportuesish, përveç qarkullimit të mallrave.

Nga ana e donatorit, u.d. ambasadore e SHBA-së, Nicole Warns, deklaroi se teknologjia moderne do t'u mundësojë doganierëve t'i kryejnë detyrat me më shumë integritet, ndërsa SHBA-ja do të vazhdojë të mbështesë forcimin e sigurisë së kufijve.

Kur do të vendosen kamerat në funksion në terren, nuk është bërë e ditur.