Kaçaniku nis fabrikën e ujit të pijshëm, investim prej afro 3 milionë eurosh

Kaçaniku ka nisur ndërtimin e Fabrikës së Ujit të Pijshëm, një investim me vlerë prej afër 3 milionë eurosh, që synon të zgjidhë furnizimin e qytetarëve me ujë të pijshëm. Fillimin e punimeve e ka njoftuar Komuna e Kaçanikut.

Në ceremoninë e fillimit të punimeve ka marrë pjesë kryetari i Komunës së Kaçanikut, Sabedin Vishi, i cili e ka cilësuar projektin si një nga investimet më të rëndësishme për qytetin. Sipas Vishit, fabrika pritet të ofrojë një zgjidhje të qëndrueshme për furnizimin e banorëve të Kaçanikut me ujë të pijshëm.

Projekti po realizohet në bashkëfinancim me Shoqatën Bamirëse "Jetimat e Ballkanit". Në fillimin e punimeve ishte i pranishëm edhe humanisti Halil Kastrati, ndaj të cilit Vishi shprehu mirënjohje, si edhe ndaj shoqatës, për bashkëpunimin dhe përkushtimin në realizimin e projektit.

"Një tjetër projekt i rëndësishëm po bëhet realitet në Kaçanik", thuhet në njoftimin e Komunës.

Nuk është bërë e ditur se kur pritet të përfundojnë punimet, e as se si është ndarë financimi mes Komunës dhe shoqatës bashkëfinancuese.