Johnson dhe Petraeus ishin në stacionin kufitar kur u godit treni: Moska goditi 'qëllimisht' lokomotivën e trenit Kiev-Varshavë

Në momentin kur treni i pasagjerëve Kiev-Varshavë u godit dy kilometra larg kufirit polak, në stacionin kufitar të Jagodinit ndodheshin dy trena të tjerë me zyrtarë perëndimorë në bord. Në njërin prej tyre, një tren diplomatik, udhëtonte ish-kryeministri britanik Boris Johnson së bashku me "këshilltarë sigurie nga disa vende anëtare të BE-së dhe ish-udhëheqës evropianë". Në tjetrin ndodhej ish-drejtori i CIA-s, David Petraeus. Këtë e bëri të ditur të dielën operatori hekurudhor i Ukrainës, i cili nuk saktësoi se sa larg ishin zyrtarët nga treni i sulmuar.

Nga goditja nuk u raportuan viktima. Presidenti ukrainas Volodymyr Zelensky tha se Moska e goditi lokomotivën "qëllimisht".

Polonia dhe Ukraina e cilësuan sulmin si "përshkallëzim" të veprimeve ruse. "Përshkallëzimi i veprimeve të Federatës Ruse po bëhet fakt, dhe shembujt e tij janë gjithnjë e më afër kufirit tonë", shkroi në rrjetin X kryeministri polak Donald Tusk, pas një mbledhjeje për sigurinë të dielën. Tusk paralajmëroi rrezikun nga përdorimi në rritje prej Rusisë i dronëve sulmues me rreze të gjatë veprimi me motor reaktiv, dukshëm më të shpejtë dhe më të vështirë për t'u rrëzuar sesa pajisjet e mëparshme me helikë.

Ministri i Jashtëm i Polonisë, Radoslaw Sikorski, foli të dielën në Kiev dhe kërkoi që ky "përshkallëzim" t'i shtyjë aleatët ta "dyfishojnë" mbështetjen për Ukrainën. "Kjo ishte vetëm pak qindra metra nga kufiri polak; kjo prek sigurinë e bashkatdhetarëve të mi", tha ai.

Shqetësimi polak nuk është abstrakt. Raketa dhe dronë rusë kanë rënë edhe më parë në territorin e Polonisë, përfshirë incidentin e vitit 2022, kur një raketë ruse shpërtheu në fshatin polak Przewodow, duke vrarë dy persona. Pikat kufitare të Ukrainës me Poloninë janë kanali nëpër të cilin kalon pjesa më e madhe e ndihmës ushtarake dhe humanitare të dërguar nga aleatët perëndimorë.

Vetë Johnson reagoi të dielën me një postim në X, ku tha se nuk e kupton se çfarë "logjike të shtrembër" qëndron pas sulmit "të rastësishëm dhe të pakuptimtë" ndaj lokomotivës, duke përshëndetur guximin e personelit hekurudhor ukrainas.

Të njëjtën ditë, nga një front tjetër i luftës, presidenti amerikan Donald Trump i kërkoi Kievit ta zbusë fushatën e goditjeve me rreze të gjatë kundër infrastrukturës naftësjellëse ruse, duke ia veshur këtyre sulmeve çmimin e naftës dizel në SHBA, që kaloi 6 dollarë për gallon (1.59 dollarë për litër). "Zoti Zelensky duhet të bëjë një gjë. Ai duhet të ndalë shkatërrimin e naftës dizel në Rusi", u tha ai gazetarëve në kuadër të turneut të golfit Irish Open.

Ukraina prej muajsh ka në shënjestër industrinë ruse të naftës dhe gazit me sulme në thellësi, çka ka sjellë racionim karburanti dhe radhë të gjata në pikat e karburantit në Rusi. Si përgjigje, Moska ndaloi në korrik eksportet e dizelit, duke tërhequr sasi nga një treg global tashmë i shtrënguar. Kievi thotë se industria e naftës e Rusisë njëkohësisht financon dhe ushqen drejtpërdrejt pushtimin e Ukrainës, që zgjat prej më shumë se katër vjetësh.