"Jo në emrin tim": sonte nata e gjashtë e protestave kundër vendimit të Speciales

Sheshi "Skënderbeu" pritet të mbushet sërish sonte. Nga ora 21:00 mbahet nata e gjashtë e protestës nën moton "Jo në emrin tim", vazhdimësi e valës së tubimeve kundër vendimit të Dhomave të Specializuara.

Mbrëmjen e kaluar, në natën e pestë, mijëra qytetarë u mblodhën në të njëjtin shesh për të shprehur kundërshtimin ndaj këtij vendimi. Tubimi nisi me shpalosjen e një flamuri të madh kombëtar, mbi të cilin ishte vendosur edhe emblema e Ushtrisë Çlirimtare të Kosovës.

Mes pjesëmarrësve ishin edhe djemtë dhe familjarët e Hashim Thaçit, Kadri Veselit, Rexhep Selimit dhe Jakup Krasniqit.

Vendimi i Dhomave të Specializuara ka nxitur reagime edhe në nivelin më të lartë politik. Albin Kurti është shprehur për këtë vendim se "Ka pasaktësi dhe gabime ligjore, duhet korrigjuar në Apel". Ndërkaq, platforma "Liria ka Emër" ka deklaruar: "Nuk ndalemi deri në liri për çlirimtarët".

Në të njëjtën ditë me protestën e radhës, studentët marshojnë në Prishtinë kundër aktgjykimit të Dhomave të Specializuara.