"Jo në emrin tim": shqiptarët në Bonn protestojnë kundër vendimit të Specialeve

Bonni i Gjermanisë pritet të bëhet të premten skena e një proteste të shqiptarëve kundër aktgjykimit të shkallës së parë që Dhomat e Specializuara të Kosovës në Hagë kanë shpallur ndaj ish-krerëve të Ushtrisë Çlirimtare të Kosovës (UÇK).

Tubimi është paralajmëruar nga platforma "Liria ka Emër" (LKE), e cila ka njoftuar se protesta do të nisë në orën 19:00. Motoja e zgjedhur nga organizatorët është "Jo në emrin tim".

Në thirrjen e saj, LKE u bën apel pjesëmarrësve që të mblidhen së bashku në Bonn dhe kërkon drejtësi për ata që i quan çlirimtarë.

Dhomat e Specializuara, që kanë selinë në Hagë, janë pjesë e sistemit të drejtësisë së Kosovës dhe gjykojnë krimet e pretenduara të luftës. Vendimi i shkallës së parë ndaj ish-krerëve të UÇK-së nuk është përfundimtar.