“Jo në emrin tim”: Sheshi i Prishtinës mblidhet për të katërtën natë radhazi

Sheshi “Skënderbeu” në qendër të Prishtinës pritet të mbushet edhe sonte. Në orën 21:00 nis protesta e katërt radhazi kundër aktgjykimit të Dhomave të Specializuara ndaj ish-krerëve të UÇK-së, i shpallur në Hagë.

Thirrjen për tubim e ka bërë organizata “Liria ka Emër”. Organizatori Çlirim Haziri ka konfirmuar se protesta e sonte shënon ditën e katërt të mobilizimit qytetar.

“Edhe sonte, bashkë në shesh. UÇK nuk është vetëm. Asnjëherë. Nuk heshtim përballë padrejtësisë”, ka shkruar Haziri.

Tubimet po zhvillohen nën moton “Jo në emrin tim”, moto që është kthyer në shenjën dalluese të katër netëve të fundit të grumbullimeve qytetare në kryeqytet.