"Jo në emrin tim": mërgimtarët shqiptarë dalin sonte në protestë në Stuttgart

Në orën 19:00 sonte, në Stuttgart të Gjermanisë, pritet të nisë një protestë e shqiptarëve të diasporës kundër dënimit të ish-krerëve të UÇK-së nga Dhomat e Specializuara të Kosovës me seli në Hagë. Motoja nën të cilën thirren pjesëmarrësit është "Jo në emrin tim".

Nismën e kanë marrë të rinj shqiptarë në Gjermani, të cilët kanë ftuar bashkatdhetarët të mblidhen në qendër të qytetit. Sipas organizatorëve, tubimi është lejuar nga policia e qytetit.

Në njoftimin e tyre, pjesëmarrësit ftohen të vijnë të pajisur me flamurin kombëtar dhe emblemën e UÇK-së, si dhe të veshur me ngjyrat kuq e zi, një pamje që synon t'i japë protestës karakterin e një reagimi kolektiv të diasporës ndaj vendimit të gjykatës së Hagës.

Reagimet ndaj dënimeve të shqiptuara nga Dhomat e Specializuara kanë kaluar tashmë përtej kufijve të Kosovës dhe po marrin formë edhe në vendet ku jeton pjesa më e madhe e mërgatës shqiptare. Gjermania, me komunitetin e saj të gjerë shqiptar, është ndër vendet e para ku po organizohet një tubim i tillë.