"Jo në emrin tim" kalon me 28 vota në Mitrovicë, por karrigia e kryetarit Peci mbetet bosh

Deklarata "Jo në emrin tim" u miratua me 28 vota pro në seancën e sotme të Kuvendit Komunal të Mitrovicës së Jugut. Në sallë, në vend të kryetarit të komunës, Faton Peci, ishte nënkryetari.

Përmbajtja e dokumentit është e drejtpërdrejtë: mospajtim me aktgjykimin e shkallës së parë të shpallur më 16 shtator 2026 nga trupi gjykues i Dhomave të Specializuara të Kosovës ndaj ish-krerëve të Ushtrisë Çlirimtare të Kosovës. Në deklaratë theksohet se, për një dënim penal të kësaj peshe, përgjegjësia personale e secilit të akuzuar duhet të provohet me prova të qarta, konkrete dhe bindëse, përtej çdo dyshimi të arsyeshëm. Po ashtu, thuhet se përgjegjësia penale individuale nuk duhet të ndërtohet mbi supozime, përgjithësime, dëshmi të tërthorta apo lidhje të nxjerra nga pozitat politike dhe ushtarake që individët kanë mbajtur gjatë luftës.

Mungesa e kryetarit u bë vetë temë. Kryetari i Kuvendit Komunal, Safet Kamberi, tha se ftesa dhe materiali për seancën kanë shkuar te ekzekutivi i komunës, përfshirë kryetarin dhe drejtorët.

"Kur thirret seanca, materiali është i obliguar të shkojë te kryetari dhe te ekzekutivi, te drejtorët. E çështja e mungesës së tij, po besoj që nuk është çështja e imja. Nuk e di pse ka munguar. Vetëm një e di që materiali, siç i shkon secilit, i ka shkuar edhe atyre sepse prezent ishte nënkryetari", tha Kamberi.

As zëdhënësi i komunës, Shkëlzen Halili, nuk dha një arsye të saktë, duke folur vetëm për angazhime të tjera të kryetarit.

"Po, s'e di arsyen pse s'ka marrë pjesë kryetari, ka qenë nënkryetari, kryetari nuk ka qenë. Prej mesit të ditës, me thënë ashtu, është nga pauza, ka pasur angazhime të tjera, po saktësisht nuk e di çfarë angazhimesh. Zakonisht kur ka angazhime të shumta, nuk mundet me marrë pjesë", deklaroi Halili.