Javelinët amerikanë për FSK-në: Maqedonci pret një sasi këtë vit, por nuk përjashton vonesa

Forca e Sigurisë së Kosovës (FSK) pritet të marrë gjatë këtij viti një sasi të raketave anti-tank Javelin nga Shtetet e Bashkuara të Amerikës, por ministri i Mbrojtjes, Ejup Maqedonci, nuk merr përsipër të garantojë se afati do të mbahet.

Në një paraqitje në Tëvë1, Maqedonci tha se palët janë "në procesin përfundimtar të arritjes" dhe se po diskutohet që Kosova ta ketë sasinë e parë brenda vitit, ashtu siç, sipas tij, u premtua vitin e kaluar. Megjithatë, ministri pranoi se nuk mund të gjykojë për vonesat e mundshme, duke pasur parasysh që ShBA-ja "po lufton aktualisht në disa fronte të luftës".

Sipas tij, kërkesat për këtë armë janë shumë të mëdha, ndërsa Uashingtoni ka mbështetur vazhdimisht Ukrainën. Si shembull të pritjes së gjatë, ministri përmendi vendin fqinj: "Shqipëria pas pesë viteve, i ka pranuar këtë vit dhe vendet tjera".

Kërkesa e Kosovës për blerjen e sistemit Javelin ishte pranuar nga ShBA-të në janar të vitit 2024. Data e saktë e mbërritjes së raketave ende nuk është bërë e ditur.

Ndërkohë, FSK-ja nuk është pa mbrojtje anti-tank. Maqedonci tha se në inventarin e saj ka tashmë tri lloje të tjera të sistemeve anti-tank: një të ngjashëm me Javelin, një të blerë nga Republika e Gjermanisë, të cilin ai e përshkroi si sistemin më të ri anti-tank, dhe një të blerë nga Turqia.

Ministri foli edhe për një tjetër blerje nga ShBA-të, helikopterët Black Hawk. Sipas tij, procedurat po vazhdojnë dhe po bëhen përgatitjet e nevojshme, përfshirë ndërtimin e hangarëve që do t'i strehojnë ato.