Jashari: Shfuqizimi i ligjit për Speciale është i pamundur, ka vetëm një hapësirë ligjore

Ndërsa protestat vazhdojnë çdo ditë në Kosovë pas dënimit të katër ish-krerëve të UÇK-së, ish-Avokati i Popullit, Hilmi Jashari, u ka dalë përpara propozimeve që qarkullojnë këto ditë në debatin publik: sipas tij, shfuqizimi i Ligjit për Dhomat e Specializuara të Kosovës nuk mund të bëhet.

"Unë kam dëgjuar këto ditë, edhe nga njerëz kompetentë që zgjidhja e vetme është shfuqizimi i ligjit, pastaj dëgjon që duhet presidenti t'i falë të dënuarit, por praktikisht është e pamundur të ndërmerret një aventurë e tillë, në aspektin ligjor dhe juridik", tha Jashari në emisionin "KallxoPërnime".

Hapësira që ai sheh është tjetërkund. Jashari u ndal te amendamenti 162 i Kushtetutës, konkretisht te pika 10, e cila, siç shpjegoi, kërkon një ligj të veçantë për gjyqtarët e Gjykatës Speciale, ligj që nuk është miratuar kurrë.

"Një gjë që unë besoj ka hapësirë për t'u diskutuar është pikërisht këto amendamentet, 162 të Kushtetutës, në të cilën në pikën 10 e përcakton që zgjedhja dhe emërimi dhe mbikëqyrja e gjyqtarëve duhet të rregullohet me një ligj të veçantë. Ai ligj i veçantë nuk është nxjerrë asnjëherë, edhe pse në kuadër të ligjit për Dhomat e Specializuara ka disa nene, por është kriter i amendamenteve kushtetuese që janë bërë, që me qenë një mundësi e tillë", deklaroi ai.

Sipas Jasharit, një ndërhyrje e tillë ligjore do të ndikonte pozitivisht në procesin që po zhvillohet në Hagë. "Prandaj, një efekt i tillë që kish mujtë me u bë me plotësim-ndryshim të ligjit, ose një ligji të ri në lidhje me zgjedhjen, emërimin dhe mbikëqyrjen e gjyqtarëve atje, unë besoj që kish mujtë me pas një efekt të mirë dhe është një temë që duhet me trajtu", tha ai në të njëjtin emision.

Debati vjen pas 16 shtatorit 2026, kur Gjykata Speciale dënoi katër ish-krerët e UÇK-së. Ish-presidenti i Kosovës, Hashim Thaçi, mori 25 vjet burgim, pasi gjykata e shpalli përgjegjës për krime që përfshijnë vrasje, torturë, trajtim mizor dhe ndalim të paligjshëm gjatë luftës në Kosovë.

Kadri Veseli u dënua me 18 vjet burgim, i shpallur fajtor për krime lufte, përfshirë ndalimin e paligjshëm ose arbitrar, trajtimin mizor, torturën dhe vrasjen e paligjshme. Jakup Krasniqi u dënua me 25 vjet burgim për krime lufte që përfshijnë ndalimin arbitrar, trajtimin mizor, torturën dhe vrasjen e paligjshme. Rexhep Selimi mori 13 vjet burgim, pasi trupi gjykues e shpalli fajtor për krime lufte, përfshirë trajtimin mizor, torturën dhe vrasjen e paligjshme.

Dënimet janë shqiptuar në shkallën e parë dhe palët kanë të drejtë ankese në Apel.