"Ishte një gabim, më vjen keq": Granit Xhaka pranon se siguroi certifikatën e COVID-19

Para se të ulet përballë hetuesve, Granit Xhaka zgjodhi ta thotë vetë. Kapiteni i përfaqësueses së Zvicrës pranoi përmes një deklarate në Instagram se kishte siguruar një certifikatë vaksinimi kundër COVID-19, në një kohë kur ndaj tij po zhvillohet një hetim nga Prokuroria e Luzernit.

"Në ditët e fundit është raportuar shumë për një çështje nga e kaluara ime. Dua ta trajtoj personalisht këtë çështje", shkroi ai, duke hapur deklaratën.

Në vijim, Xhaka shpjegoi gjendjen e tij në periudhën kur u vendos regjimi i certifikatave. "Sa i përket vaksinimit kundër COVID-19, në atë kohë isha personalisht shumë i pasigurt dhe kisha shqetësime serioze. Kisha një mosbesim të thellë ndaj vaksinës dhe isha i mbushur me frikë dhe pasiguri", tha ai. "Në këtë gjendje të trazuar emocionale, sigurova një certifikatë vaksinimi, në vend që të sqaroja pyetjet e mia përmes kanaleve të duhura."

Vlerësimin për atë hap e bëri vetë, pa zbutje: "Sot e kuptoj qartë se kjo ishte një qasje e gabuar. Ishte një gabim. Më vjen keq." Ai shtoi se nuk do t'i shmanget procesit: "Marr përgjegjësinë për këtë vendim, jam i përkushtuar që çështja të hetohet dhe po bashkëpunoj plotësisht me autoritetet përkatëse."

Hetimi ndaj tij u bë publik nga gazeta zvicerane "Blick", sipas së cilës Xhaka dyshohet se kishte siguruar certifikata të falsifikuara të COVID-19. Marrja në pyetje nga autoritetet pritet në fillim të tetorit, ndërsa rezultati i hetimit dhe eventualet akuza formale mbeten të papërcaktuara.

Pasojat e para tashmë kanë ardhur jashtë sallës së hetuesisë: Federata Zvicerane e ka përjashtuar kapitenin nga ekipi kombëtar derisa situata të zgjidhet.