“Isha i ulur, s’paraqisja rrezik”: qytetari akuzon policinë për dhunë në protestën e Prishtinës

Ai thotë se po rrinte ulur në një ulëse kur dy policë iu vërsulën. Qytetari Artan Ramaj akuzon Policinë e Kosovës se e goditi, e përplasi për tokë dhe e tërhoqi zvarrë gjatë protestës që u përshkallëzua mbrëmë në Prishtinë.

Ramaj ka publikuar në Facebook një video, të cilën e paraqet si dëshmi se “ai u sulmua nga Policia e Kosovës”. Në pamje shihen policë duke e përplasur një person për tokë dhe duke i hedhur sprej. Videoja u shpërnda me shpejtësi në rrjetet sociale, si akuzë për dhunën e përdorur në kryeqytet.

Në rrëfimin e tij, Ramaj përshkruan goditje në kokë, në duar dhe në këmbë: “Dy prej tyre filluan të më godisnin, fillimisht derisa isha ulur në ulëse në kokë dhe në duar, këmbë, duke më gjuajtur në tokë. Në përpjekje për t’u mbrojtur, më lënduan dorën dhe më tërhoqën zvarrë, duke më gjuajtur në tokë edhe pse isha i ulur dhe nuk paraqisja asnjë rrezik”.

Pavarësisht lëndimit në dorë, ai thotë se tani është mirë, pasi mori trajtim në emergjencë.

Protesta në Prishtinë kishte dalë jashtë kontrollit më herët, kur Policia e Kosovës hodhi gaz lotsjellës, por përshkallëzimi nuk u ndal me kaq dhe vijoi edhe me akte të tjera. Një reagim i policisë ndaj akuzave të Ramajt nuk është bërë i ditur.