Rrëfimi i Bedri Zyberajt për Behajdin Allaqin: e strehova një natë, pastaj humbi gjurmët

Në ditët kur Behajdin Allaqi kaloi nëpër Shtabin e UÇK-së në Drenoc të Rahovecit, as Hashim Thaçi e as Kadri Veseli nuk ishin aty. Këtë e pohon Bedri Zyberaj, ish-epror i UÇK-së në atë shtab: "Aty ku e kemi taku ne, atë s’ka qenë në shtab Kadri Veseli as Hashim Thaçi. Me pasë qenë ata në shtab, unë e kisha ditë, i kisha pa. S’kanë qenë aty ato ditë fare."

Dëshmia e tij prek drejtpërdrejt një nga rastet e përmendura në aktgjykimin ndaj ish-krerëve të UÇK-së në Hagë. Prokuroria e Specializuar kishte pretenduar se Thaçi dhe Veseli ishin ndër personat e fundit që e kishin parë Allaqin, duke pohuar gjithashtu se ai ishte vrarë.

Në një intervistë ekskluzive për Lirim Mehmetajn në VOX Kosova, Zyberaj rindërtoi takimet e tij me Allaqin. Sipas rrëfimit të tij, në qershor të vitit 1998 Allaqi erdhi në shkollë tek ai dhe kërkoi Shaban Shalën, për të cilin kishte dëgjuar se ishte i ndaluar në shtab. Zyberaj thotë se i tha që nuk kishte dijeni dhe se çështja nuk ishte në kompetencën e tij, prandaj e drejtoi te Gani Paqarizi, "që ishte kompetent".

Allaqi ishte paraqitur rreth orës 10 të paradites. Rreth orës 14:30, sipas Zyberajt, ata u takuan sërish dhe Allaqi i tregoi se një pjesë e punës kishte përfunduar, ndërsa pjesa tjetër do të vazhdonte. Donte të kthehej në shtëpi, por zona ishte e bllokuar dhe nuk gjeti mjet për të udhëtuar. I lodhur, kërkoi të shkonte te familja e Zyberajt. "Atë natë s’ka pasë me çka me u kthy në shtëpi të vet, i kam bo konak në shtëpinë time", tregon ish-eprori. Të nesërmen, sipas tij, Allaqi u nis për në Prizren.

Pas disa ditësh erdhi përsëri. Zyberaj kujton një detaj që i ra në sy: Allaqi mbante në dorë një letër të formatit A4, "gjysmë të shkruar", të cilën e nxori nga një qese. Edhe këtë herë, thotë ai, Allaqi shkoi me Gani Paqarizin, ndërsa vetë vazhdoi punën e tij pa pasur arsye të interesohej më tej.

Dy javë më vonë nisën pyetjet. Miqtë dhe shokët e Allaqit erdhën të kërkonin se ku ndodhej. Zyberaj thotë se iu drejtua Paqarizit, sepse ai ishte i vetmi që kishte qenë me Allaqin. Përgjigjja që pretendon se mori ishte e shkurtër: "Jo more, ka kry punë me neve çka ka pasë edhe e kam përcjellë, ka shku për shpi". "Këto janë fjalët e Gani Paqarizit që m’i ka thanë mu, që ka nejt i fundit me të", shton Zyberaj.

Interesimi për fatin e Allaqit, sipas tij, nuk u shua gjatë gjithë vitit 1998. Në fund të atij viti, kur ndodhej në Krushë të Madhe, një nga motrat e Allaqit i kërkoi një përgjigje me shkrim për gjithçka që dinte. Zyberaj thotë se ia ktheu në një letër të datës 26 dhjetor 1998: "Dëshminë ia kam dhënë, katër faqe me shkrim dore, në detaje kam rrëfye".

I njëjti rrëfim, sipas tij, u ka mbërritur edhe prokurorëve. Zyberaj thotë se u intervistua nga Prokuroria Speciale në Kosovë në vitin 2018 dhe nga Prokuroria e Dhomave të Specializuara në janar të vitit 2020, duke shtuar se prokuroria kishte në dispozicion letrën e tij të plotë.