Irani hap Ormuzin për tankerët irakianë, pas kërkesave të njëpasnjëshme të Bagdadit

Irani ka miratuar kalimin e një numri më të madh tankerësh irakianë të naftës nëpër Ngushticën e Ormuzit, pasi Bagdadi kishte parashtruar kërkesa të përsëritura përmes kanaleve të ndryshme. Lajmin e bëri të ditur agjencia shtetërore iraniane e lajmeve IRNA, e cituar nga agjencia britanike Reuters.

Sipas IRNA-s, marrja e një lejeje të veçantë për tankerët irakianë ishte një nga kërkesat kryesore të Bagdadit gjatë vizitës së kryetarit të parlamentit iranian, Mohamed Baker Kalibaf, në Irak.

Presidenti irakian, Nizar Amedi, tha se Irani e ka lehtësuar ditët e fundit kalimin e anijeve që transportojnë naftë irakiane nëpër ngushticë, duke shtuar se Bagdadi ka biseduar me zyrtarë iranianë për eksportin e naftës irakiane përmes Ormuzit.

Iraku ka qenë ndër vendet më të goditura nga mbyllja iraniane e Ngushticës së Ormuzit. Trafiku në këtë korridor detar mbetet ndjeshëm nën nivelet e periudhës para luftës, ndërsa anijet vazhdojnë të përballen me sulme në zonë. Para shpërthimit të luftës në Iran, Iraku prodhonte rreth katër milionë fuçi naftë në ditë.

Paralelisht me përpjekjet për të rihapur rrugën e Ormuzit, autoritetet irakiane kanë bërë të ditur më herët se Bagdadi po punon për zgjerimin e eksporteve përmes portit turk të Xhejhanit, si dhe përmes portit sirian të Banijasit dhe atij jordanez të Akabës.