Inspektorati i Mjedisit ndal punimet në 32 raste, 39 gjoba brenda dy javësh

Tridhjetë e dy kantiere janë urdhëruar të ndalin punimet brenda dy javësh. Ky është elementi më i fortë i bilancit që ministrja e Mjedisit dhe Planifikimit Hapësinor, Fitore Pacolli, ka bërë publik për veprimtarinë e Inspektoratit të Mjedisit gjatë dy javëve të fundit.

Sipas njoftimit të ministres, gjatë kësaj periudhe janë kryer 52 inspektime të mbyllura me procesverbal dhe janë shqiptuar 39 gjoba administrative. Përveç vendimeve për ndërprerje të punimeve, inspektorët kanë përgatitur edhe 23 raporte dhe përgjigje ndaj palëve.

Pacolli ka theksuar se Inspektorati i Ministrisë së Mjedisit dhe Planifikimit Hapësinor po vazhdon punën për mbrojtjen e mjedisit, të ujërave dhe të natyrës, si dhe për garantimin e ligjshmërisë në fushën e planifikimit dhe ndërtimit.

“Vazhdojmë me punë e angazhim për një Kosovë të pastër e të gjelbër, ku ligji zbatohet njësoj për të gjithë dhe ku interesi publik është mbi çdo interes tjetër”, ka deklaruar Pacolli.