Ilaçe për të sëmurët me kancer, të fshehura në kutinë e ndihmës së shpejtë të një autobusi

Kutia e ndihmës së shpejtë në një autobus duhej të mbante fasha dhe dezinfektues. Në pikën kufitare Bogorodicë, në hyrje të Maqedonisë së Veriut, doganierët gjetën aty 29 flakona me një ilaç që përdoret te pacientët me sëmundje malinje. Sipas Drejtorisë Doganore, ilaçet tentoi t'i kalonte kontrabandë shoferi i autobusit, një shtetas i Kosovës.

"Rasti u zbulua në hyrje të vendit në pikën kufitare Bogorodicë, ku gjatë një kontrolli të autobusit, në një kuti të ndihmës së shpejtë, u zbuluan gjithsej 29 flakona me vlerë 336 mijë denarë, 29 kuti, si dhe 30 etiketa vetëngjitëse të paketuara në një qese të zezë najloni", njoftoi Drejtoria Doganore.

Fotografitë e publikuara tregojnë se bëhet fjalë për ilaçin "Xgeva" prej 120 miligramësh, me substancë aktive denosumab. Ai përdoret, ndër të tjera, për të parandaluar komplikime serioze të kockave te pacientët me disa lloje sëmundjesh malinje. Në paketim shkruhet se duhet të ruhet në temperaturë nga 2 deri në 8 gradë Celsius, ndërsa nuk dihet nëse këto kushte janë respektuar gjatë rrugëtimit me autobus.

Importi i këtij ilaçi lejohet vetëm me autorizim nga institucionet kompetente, dhe transporti i tij i nënshtrohet standardeve të veçanta.

Sekuestrimin e kreu një ekip mobil i Departamentit për Çështje Operacionale. Departamenti për Hetime ka ngritur kallëzim penal kundër shoferit për "kontrabandë". Akuza mbetet për t'u shqyrtuar nga organet e drejtësisë.

Rasti nuk është i veçuar: sipas Drejtorisë Doganore, që nga fillimi i këtij viti në pikat kufitare janë sekuestruar më shumë se 30.000 copë ilaçe.