Ikën nga kontrolli policor në Prush të Gjakovës, tre të dyshuar braktisin Golfin e aksidentuar

Dokumentacioni dhe një telefon mbetën në duart e policisë, ndërsa vetura u gjet e aksidentuar. Tre persona të dyshuar u zhdukën në errësirë pas një kontrolli të dështuar policor në fshatin Prush të Gjakovës.

Ngjarja ndodhi më 19 shtator, rreth orës 23:55. Sipas raportit 24-orësh të Policisë së Kosovës, një njësi policore kishte ndaluar një veturë Golf 7, në të cilën udhëtonin tre persona meshkuj: drejtuesi, një shtetas i huaj, dhe dy pasagjerë.

Në momentin kur të dyshuarit kuptuan se automjeti do t'i nënshtrohej kontrollit, vozitësi u largua me shpejtësi nga vendi i ndalimit. Pas tij mbetën dokumentacioni dhe telefoni, të dorëzuar pak më parë te njësia policore.

Ndjekja e rastit çoi te vetura, e cila ndërkohë kishte përfunduar e dëmtuar. "Policia ka arritur të identifikojë lokacionin e veturës ku është verifikuar se të njëjtit kanë shkaktuar edhe vetë aksident gjatë ikjes", thuhet në raportin policor.

Automjeti është konfiskuar. Tre të dyshuarit vazhdojnë të jenë në arrati dhe identiteti i tyre nuk është bërë publik. Për rastin është njoftuar prokurori kujdestar.