Ibër-Lepenc: dëshmitarja rrëfen natën e shpërthimit, gjykata pranon dëshmitarët e mbrojtjes

Një detonim aq i fuqishëm sa e bëri të mendonte se ishte tërmet: kështu e kujton një banore e fshatit Varagë të Zubin Potokut natën e 29 nëntorit 2024, kur shpërtheu kanali i Ibër-Lepencit. Ajo dëshmoi të martën në Gjykatën Themelore në Prishtinë, si dëshmitare nga pala e dëmtuar, në gjykimin ndaj tre të akuzuarve për sulmin.

"Kam qenë e shtrirë në shtëpinë time, nuk ka qenë askush në shtëpi. Nuk mund ta saktësoj kohën, por më kujtohet detonim shumë i madh, mendoj që ka qenë errësirë. Kur kam dalë dhe kam parë që një sasi e madhe e ujit vinte drejt shtëpisë sime, veturat janë ardhur shkaku i ujit. Shtëpia ime ndodhet përfundi rrugës magjistrale, ndërsa ngjarja ka ndodhur mbi rrugën magjistrale. Detonimi ka qenë i madh, është shkundur shtëpia, themeli ka lëvizur si dhe qynga e shporetit ka dalë nga vendi dhe në ato momente kam menduar mos është ndonjë tërmet. Kam dalë në dritare të shoh se çka ka ndodhur, pasi që kam dëgjuar eksplozivin, kam parë ujin shumë sasi të madhe, sepse ajo ndodhet në afërsi të shtëpisë sime, kam thirrur nënën në telefon, kam kërkuar ndihmë që të vijë dhe të shohë se çka po ndodh", tha ajo.

Kur prokurori special Bekim Kodraliu e pyeti nëse ishte frikësuar, përgjigjja e saj ishte e shkurtër: "Po, shumë, sepse kam qenë vetëm në shtëpi".

Sipas dëshmitares, dëmet nuk u kufizuan te shtëpia. Ajo tregoi se u dëmtuan edhe stalla dhe toka bujqësore e familjes, ndërsa e vetmja ndihmë që morën erdhi nga kryetari i komunës. "Ekzistojnë edhe fotografitë. Nuk mund ta di saktë sa ka qenë dëmtimi, mirëpo ne kemi pasur edhe stalla të cilat janë dëmtuar, jemi marrë edhe me bujqësi është dëmtuar edhe toka bujqësore. Ne në ato momente kemi kërkuar ndihmë, vetëm kryetari i komunës na ka ndihmuar me shumë të hollash prej 1 mijë e 300 euro. Nuk është që na është kompensuar dëmi, por në ato momente na ka ndihmuar", deklaroi ajo. E pyetur nëse kërkon kompensim nga personat që dyshohet se e kryen veprën, ajo u përgjigj "jo".

Pas dëshmisë, seanca u zhvendos te beteja procedurale mes mbrojtjes dhe prokurorisë. Millosh Deloviq, avokati i të pandehurit Dragisha Viçentijeviq, kërkoi që para gjykatës të dalë eksperti i FBI-së. "Mbesim që të dëgjohet eksperti i FBI-së", tha ai.

Prokurori Kodraliu e kundërshtoi. "Ne si prokurori i kundërshtojmë propozimet e palës mbrojtëse për arsye se në këtë hetim penal kanë qenë të angazhuar edhe partnerët ndërkombëtarë, kështu që gjatë fazës së hetimeve kemi ndërmarrë të gjitha veprimet e nevojshme për ndriçimin e plotë të kësaj çështje penale. Kemi intervistuar edhe dëshmitarë të tjerë edhe të dyshuar të tjerë dje nga të gjitha provat që kemi siguruar, kemi vërtetuar përtej dyshimit të bazuar që këta dy të pandehur janë kryerësit e kësaj vepre penale. Çdo dëshmitar tjetër nga pala mbrojtëse do ta prolongojë procedurën penale", tha ai.