Hyrja e Gjilanit nën punime nga 5 tetori: qarkullim i kufizuar për rreth dy muaj

Nga 5 tetori, hyrja e Gjilanit nga drejtimi i Prishtinës kthehet në kantier. Kryetari i Komunës së Gjilanit ka njoftuar nisjen e punimeve në këtë segment, pjesë e projektit "Rehabilitimi dhe zgjerimi i rrugës N25.2, segmenti Bresalc-Gjilan (Hyrja Gjilan)".

Punimet pritet të zgjasin rreth dy muaj. Afati mund të ndryshojë, në varësi të dinamikës me të cilën do të realizohet projekti. Gjatë gjithë kësaj kohe do të ketë kufizime në qarkullim, ndërsa edhe banorët dhe bizneset e zonës do ta kenë më të vështirë qasjen.

Për të shmangur bllokimet, qytetarëve u rekomandohet të përdorin rrugën "Pajazit Ahmeti" në drejtim të rrethit "28 Nëntori", si dhe rrugën "15 Qershori" në drejtim të rrugëve "Haki Myderizi" dhe "NATO 99".

Komuna e Gjilanit u ka kërkuar qytetarëve mirëkuptim dhe bashkëpunim gjatë punimeve, duke u bërë thirrje pjesëmarrësve në trafik të respektojnë sinjalizimin e përkohshëm dhe udhëzimet e vendosura në terren.