Hiri vullkanik mbi kryeqytet: Xhakarta pezullon operacionet ajrore

Gjëmimet e vullkanit u dëgjuan deri në 700 kilometra larg, ndërsa hiri arriti mbi kryeqytetin indonezian. Aeroporti Ndërkombëtar Soekarno-Hatta, hyrja kryesore ajrore e Indonezisë pranë Xhakartës, njoftoi të dielën në mëngjes se kishte pezulluar operacionet e fluturimit deri në orën 13:30 sipas kohës lokale, për shkak të "aktivitetit të shtuar shpërthyes" të malit Anak Krakatau, i cili ndodhet më shumë se 150 kilometra larg.

Vullkani nisi të shpërthejë natën e së premtes, duke nxjerrë një shatërvan llave dhe gjëmime që, sipas agjencisë meteorologjike BMKG, dëgjoheshin deri në 700 kilometra distancë. Të dielën, agjencia e vullkanologjisë paralajmëroi se ishin regjistruar dy shpërthime të reja.

Sipas BMKG-së, hiri u identifikua në lartësi deri në 6.000 metra në anën e Javës, ndërsa në anën e Sumatrës dhe në disa pjesë të provincës Banten në Javë u shënua një shtyllë hiri deri në 15.000 metra.

Një pezullim i mëparshëm i aeroportit duhej të përfundonte në orën 5:30 të mëngjesit dhe kishte prekur 33 fluturime, mes tyre 16 anulime ndërkombëtare dhe shtatë vonesa, bëri të ditur Ministria e Transportit e Indonezisë. Drejtori i Përgjithshëm i Aviacionit Civil, Lukman F. Laisa, tha se zgjatja e pezullimit erdhi pas një testi me letër të kryer mes orës 00:35 dhe 01:05, i cili konfirmoi praninë e hirit vullkanik në aeroport.

"Siguria mbetet prioriteti kryesor në çdo vendim operacional, përfshirë përshtatjet e orareve të fluturimeve nga kompanitë ajrore", deklaroi Lukmani, duke shtuar se autoritetet do të vazhdojnë të monitorojnë situatën së bashku me kompanitë ajrore, shërbimet e navigacionit ajror dhe agjencinë meteorologjike të vendit.

Ndër kompanitë e prekura ishte Singapore Airlines, e cila anuloi të shtunën dy fluturime drejt dhe nga Xhakarta dhe shtyu dy të tjera për të dielën. Hiri vullkanik konsiderohet rrezik serioz për avionët, pasi mund të dëmtojë motorët reaktivë dhe të zvogëlojë dukshmërinë.

Agjencia indoneziane për zbutjen e fatkeqësive njoftoi të shtunën se nga ky shpërthim nuk ka rrezik të menjëhershëm cunami. Kujtesa e vendit për këtë vullkan mbetet e rëndë: në vitin 2018, një shpërthim i Anak Krakataut shkaktoi shembjen e pjesshme të kraterit dhe një cunami që vrau më shumë se 400 persona përgjatë brigjeve të Javës dhe Sumatrës.

Anak Krakatau doli nga deti në vitet 1920 brenda kalderës së lënë nga shpërthimi katastrofik i Krakatoas në vitin 1883, një nga ngjarjet vullkanike më vdekjeprurëse në historinë e regjistruar. Që atëherë ai ka shpërthyer periodikisht.