Haxhiu pas aktgjykimit në Hagë: "Populli nuk dëshmon", askush nuk mbrohet me etiketime

"Populli nuk dëshmon. Dëshmojnë individë, secili me emër dhe me përgjegjësi vetjake." Me këtë fjali, ushtruesja e detyrës së presidentes së Kosovës, Albulena Haxhiu, ka kundërshtuar publikisht valën e akuzave për "spiunim" që ka shpërthyer pas shpalljes së aktgjykimit ndaj ish-drejtuesve të Ushtrisë Çlirimtare të Kosovës në Hagë.

Në reagimin e saj publik, Haxhiu e cilëson mbrojtjen e ish-drejtuesve të UÇK-së si detyrim qytetar dhe institucional, por thekson se ky qëllim humbet kuptimin kur kthehet në gjueti ndaj kundërshtarëve politikë, dëshmitarëve apo qytetarëve.

"Mbrojtja e ish-drejtuesve të UÇK-së është detyrë qytetare e institucionale. Por askush nuk i mbron ata duke shpallur aty për aty "spiunë" e "tradhtarë" kundërshtarët politikë, duke shënjestruar dëshmitarë apo duke kërkuar fajtorë mes qytetarëve të Kosovës. Shënjestrimi me këto emërtime, në protesta, në emisione televizive dhe në postime publike, dje dhe sot riprodhon pikërisht logjikën e akuzës së ngritur ndaj drejtuesve të UÇK-së, etiketimin e kundërshtarit si armik dhe kthimin e tij në shënjestër. Kështu, në emër të mbrojtjes, i jepet fuqi vetë akuzës", shkroi ndër të tjera ajo.

Pika e dytë e reagimit godet përpjekjet për të paraqitur një popull të tërë si burim të "spiunimit". Sipas Haxhiut, një qasje e tillë është e pavërtetë, fyese dhe e rrezikshme, pasi mbjell frikë, nxit linçim dhe e shndërron dhimbjen në përçarje. Dëshmitë, thotë ajo, janë përgjegjësi vetjake e individëve, jo e një kombi.

Njëkohësisht, ushtruesja e detyrës së presidentes ka kërkuar që dyshimet të kalojnë në rrugë institucionale: kushdo që ka të dhëna për persona që kanë dëmtuar apo dëmtojnë interesin kombëtar dhe shtetëror duhet ta dorëzojë ato në organet e sigurisë dhe të drejtësisë. "Sepse këto raste duhet të adresohen në plotëni", shkroi ajo.

Mesazhin e ka mbyllur me një vijë të kuqe ndaj shpifjeve dhe kërcënimeve: "Asnjë padrejtësi nuk ndreqet duke prodhuar një padrejtësi tjetër. Vlerat e luftës së UÇK-së nuk mbrohen me shpifje dhe kërcënime, por me të vërtetën, drejtësinë dhe dinjitetin që e kanë mbajtur gjallë popullin tonë."

Në fund, Haxhiu ka bërë thirrje secilit individ që del apo vepron publikisht të tregojë maturi dhe të paraqesë vlerat dhe virtytet që karakterizojnë shoqërinë dhe kombin, pa lejuar që dhimbja të kthehet në përçarje të brendshme. Për përmbajtjen e aktgjykimit, të gjykuarit apo dënimet, reagimi i saj nuk jep detaje.