Hashash në frigoriferë: 414 kilogramë drogë në depot mes Guidonias dhe Romës

Valixhet e mëdha që po hidheshin në bagazhin e një automjeti ishin vetëm fillimi. Brenda tyre policia italiane gjeti 98 kilogramë hashash, por sasia përfundimtare e sekuestruar në këtë operacion arriti në mbi 414 kilogramë.

Në pranga përfundoi një 29-vjeçar me origjinë shqiptare, i cili ishte vënë prej kohësh në vëzhgim nga efektivët e Seksionit VII Antidrogë të Skuadrës së Lëvizshme të Romës. Ai u ndalua pikërisht në momentin kur po ngarkonte valixhet në makinë.

Gjatë kontrollit, policia i gjeti një tufë çelësash. Ata hapnin disa ambiente në zonën e Guidonias dhe të Romës, të përdorura si depo për magazinimin e drogës. Aty u zbuluan sasi të mëdha hashashi dhe materiale për paketimin e saj, ndërsa një pjesë e konsiderueshme e lëndës narkotike ishte fshehur brenda frigoriferëve, të përshtatur si hapësira magazinimi.

Në të njëjtat ambiente u gjetën edhe shënime të shkruara me dorë, ku dyshohet se ishin regjistruar sasitë e drogës së magazinuar dhe të lëvizur, si dhe materiale të tjera që dyshohet se shërbenin për përgatitjen dhe paketimin e hashashit.

Sipas hetuesve italianë, nëse kjo drogë do të hidhej në tregun me pakicë, do të mund të gjeneronte të ardhura të paligjshme prej më shumë se 4 milionë eurosh.

29-vjeçari u arrestua për posedim të lëndëve narkotike me qëllim trafikimin. Autoriteti gjyqësor italian e ka vleftësuar arrestimin dhe ka caktuar ndaj tij masën e arrestit në burg. Ai mbetet i dyshuar derisa çështja të marrë një vendim përfundimtar gjyqësor.