Hasani për apelin e Thaçit: Goditja duhet t'i bëhet "ndërmarrjes së përbashkët kriminale"

Beteja e vërtetë në apel, sipas ish-kryetarit të Gjykatës Kushtetuese të Kosovës, Enver Hasani, nuk është te detajet e aktgjykimit, por te forma e përgjegjësisë me të cilën është ndërtuar ai. Duke folur për mundësinë e apelimit të aktgjykimit ndaj Hashim Thaçit dhe të tjerëve, Hasani u shpreh se fokusi duhet të jetë rrëzimi i koncepteve të "ndërmarrjes së përbashkët kriminale" dhe i "komandës e kontrollit".

"Duhet me e fokusu me apel dhe duhet me u fokusu në rrëzimin e asaj që thuhet ndërmarrje e përbashkët kriminale dhe po ashtu komandën e kontrollit", deklaroi Hasani.

Në vlerësimin e tij, kundërshtimi duhet të drejtohet pikërisht kundër mënyrës së përcaktimit të përgjegjësisë, duke u mbështetur edhe në aktgjykime të mëparshme që, siç thotë ai, kanë krijuar praktikë gjyqësore.

"Duhet me e goditë mënyrën e përgjegjësisë dhe ka aktgjykime që kanë kriju praktikë. Në rastin e Çalit ne vetëm në një vend përmendet pjesë e ndërmarrjes së përbashkët kriminale. Kjo tregon se aktgjykimin e Çalit e kanë shkru për me ua mvesh këtyre tash", theksoi ai.

Hasani shprehu bindjen se konstruksioni i ndërmarrjes së përbashkët kriminale nuk mund të qëndrojë në shkallën e dytë, duke argumentuar se një përgjegjësi e tillë nuk ka logjikë juridike.