Harvard paguan 53 milionë dollarë, shkak tregtia makabre me trupat e dhuruar për shkencë

Kufomat ishin dhuruar për shkencën. Në vend të kësaj, pjesë të tyre — organe, lëkurë, tru dhe koka të prera — përfunduan në tregun e zi. Tani Universiteti i Harvardit ka pranuar të paguajë një marrëveshje prej 53 milionë dollarësh për të mbyllur padinë civile që lindi nga vjedhja dhe shitja e mbetjeve njerëzore të dhuruara për fakultetin e tij të mjekësisë me qëllime kërkimore.

Në qendër të skandalit qëndron Cedric Lodge, 58 vjeç, ish-menaxher i morgut të Fakultetit të Mjekësisë së Harvardit. Ai u dënua dhjetorin e kaluar me tetë vjet burg, pasi kishte pranuar fajësinë në maj për vjedhjen dhe shitjen e pjesëve të trupit njerëzor në një skemë me përmasa kombëtare. Sipas prokurorisë, skema përfshinte vjedhjen dhe shitjen e organeve, lëkurës, trurit dhe kokave të prera nga kufoma të dhuruara Harvardit nga viti 2018 e deri të paktën në mars 2020.

Edhe bashkëshortja e tij, Denise Lodge, 65 vjeçe, u dënua për rolin e saj në këtë treg të zi — me 12 muaj e një ditë burg.

Sipas një deklarate të Departamentit Amerikan të Drejtësisë, Lodge i mori mbetjet "pa dijeninë ose lejen e punëdhënësit të tij, të dhuruesit apo të familjes së dhuruesit" dhe i transportoi në shtëpinë e tij në Goffstown të New Hampshire-it, ku bashkë me gruan i dërgonte te blerësit në shtete të tjera.

"Mbetjet e vjedhura dhe të shitura nga Lodge-ët u transportuan nga morgu në Boston drejt vendeve në Salem të Masaçusetsit, në New Hampshire dhe në Pensilvani," thuhet në deklaratën e drejtësisë. "Shumë prej mbetjeve të blera nga Lodge u rishitën për fitim."

Departamenti i Drejtësisë shtoi se disa të pandehur të tjerë kanë pranuar gjithashtu fajësinë në raste të lidhura me këtë çështje dhe janë dënuar.

Marrëveshja financiare shkon përtej parave. Sipas raportimit të gazetës studentore The Harvard Crimson, Fakulteti i Mjekësisë do t'u drejtohet familjeve paditëse përmes një uebinari të drejtpërdrejtë, ku do të pohojë se sjellja e Lodge-it ishte "moralisht e dënueshme" dhe në kundërshtim me standardet e Harvardit, së bashku me një përmbledhje të ndryshimeve të bëra në Programin e tij të Dhurimit Anatomik. Fakulteti do të krijojë gjithashtu një bursë vjetore ndihme financiare për studentët e mjekësisë duke nisur nga viti akademik 2027-28, të cilën e cilëson si nismë "në vlerësim dhe në nderim të të gjithë dhuruesve tanë anatomikë".

Familjet e prekura nisën të paraqisnin padi kundër Harvardit në verën e vitit 2023, pak pas aktakuzës ndaj Lodge-it. Paditë ngrinin akuza për neglizhencë, shkelje të detyrimit fiduciar dhe shkaktim të vuajtjeve emocionale.

Kur çështja shpërtheu, dekanët e Fakultetit të Mjekësisë, George Daley dhe Edward Hundert, e cilësuan veprimin e Lodge-it si "moralisht të dënueshëm" në një deklaratë me titullin domethënës "Një tradhti e neveritshme".