Hamza vendos kushtin: së pari ligji për Gjykatën Speciale, pastaj Presidenti

Kryetari i PDK-së, Bedri Hamza, e ka bërë të qartë radhën që partia e tij kërkon: fillimisht ndryshimi i ligjit për Gjykatën Speciale, pastaj bisedimi për zgjedhjen e Presidentit të vendit.

Sipas Hamzës, qeveria duhet ta përfundojë brenda disa ditësh shqyrtimin e saj për ndryshimin e ligjit, në mënyrë që projektligji të dërgohet në Kuvend. Ai tha se në qeveri aktualisht po trajtohen opinionet ligjore për këtë projektligj, dhe se PDK-ja pranon të japë edhe pak kohë, por jo pa afat.

"Ne jemi të gatshëm të presim edhe pak kohë që brenda qeverisë ta kryejnë pjesën e vet që ka të bëjë me opinione ligjore dhe çështje të tjera, dhe presim që i njëjti shpejt, në një seancë të jashtëzakonshme të trajtohet në dy leximet në të njëjtën ditë", deklaroi Hamza.

Miratimi i ligjit është, sipas tij, pika nga ku nis diskutimi për kreun e shtetit. "Sa i përket çështjes së Presidentit, kur ta kemi ligjin e aprovuar, jemi të hapur të bisedojmë për t'i dhënë vendit President", tha ai.

Kur u pyet nëse PDK-ja do të ishte gati të votonte një kandidat për President që vjen nga LVV-ja, Hamza nuk dha përgjigje të drejtpërdrejtë. "Nuk kemi folur nga kush, por për mundësinë që ta kemi Presidentin", u shpreh ai, duke e lënë të hapur pyetjen nëse votat e PDK-së mund të shkojnë për një emër të LVV-së.