Hamza te familjet Thaçi, Veseli e Krasniqi: Nuk jeni vetëm dhe nuk do të jeni kurrë

Tri vizita në një ditë, te tri familje që presin lajme nga Haga. Kryetari i Partisë Demokratike të Kosovës, Bedri Hamza, ka shkuar sot te familjet Thaçi, Veseli dhe Krasniqi, pas aktgjykimit të Gjykatës Speciale në Hagë ndaj ish-krerëve të Ushtrisë Çlirimtare të Kosovës.

Reagimin e tij Hamza e ka bërë publik me shkrim. "Sot isha për vizitë në familjet Thaçi, Veseli dhe Krasniqi, pas vendimit të rëndë, të padrejtë dhe të pabazuar në Hagë. I sigurova se nuk janë vetëm dhe se nuk do të jenë kurrë", ka shkruar ai, duke e cilësuar kështu vendimin e gjykatës me seli në Hagë.

Kreu i PDK-së ka thënë se dhimbjen e këtyre familjeve e ndan edhe populli i Kosovës. "Dhimbja e tyre është dhimbja jonë. Mërzia e tyre është mërzia e popullit tonë", ka deklaruar ai.

Hamza ka theksuar se angazhimi i partisë së tij për drejtësi dhe për kthimin e ish-krerëve të UÇK-së në Kosovë do të vazhdojë. "Bashkë do të qëndrojmë, bashkë do të angazhohemi dhe bashkë do ta vazhdojmë betejën për drejtësi e liri, deri në kthimin në atdhe të luftëtarit të fundit të lirisë", ka shkruar ai.

Reagimin e ka mbyllur me një fjali të vetme: "Dje, sot dhe përjetësisht, çlirimtarë!"