Hamza pas shtrëngimit të duarve me Kurtin: Kundërshtarë politikë, jo armiq

Shtrëngimi i duarve mes tre liderëve politikë të Kosovës ka marrë komentin e parë nga njëri prej protagonistëve. Kryetari i PDK-së, Bedri Hamza, tha para gazetarëve se rivaliteti me kryeministrin Albin Kurti dhe me kreun e AAK-së, Ramush Haradinaj, mbetet politik dhe nuk duhet të kthehet në ndarje armiqësore mes qytetarëve.

Gjesti erdhi pasi mbrëmë liderët arritën të merren vesh për dy çështje që kishin mbajtur skenën politike nën tension: Ligjin e Speciales dhe emrin e presidentit.

Hamza e paraqiti takimin si shenjë se dialogu mes partive është i domosdoshëm, pa mohuar dallimet mes tyre. "Unë mendoj që komunikimi duhet të ekzistojë. E kam thënë edhe dje, ne do të konkurrojmë me ide e programe, edhe me kritika të bazuara e konstruktive. Ne jemi kundërshtarë politikë, por jo me polarizu popullin, qytetarët e Kosovës deri në armiqësi", tha ai.

Kurti dhe Haradinaj nuk kanë dhënë ende ndonjë koment publik për shtrëngimin e duarve.