ReklamëHapësirë reklame
ReklamëHapësirë reklame
Reklamë
Pas dënimit të Hashim Thaçit, Kadri Veselit, Jakup Krasniqit dhe Rexhep Selimit nga Gjykata Speciale në Hagë, kryetari i PDK-së, Bedri Hamza, e quajti vendimin "ditë të turpit për drejtësinë ndërkombëtare" dhe njoftoi se partia do të ndërmarrë veprime demokratike dhe ligjore.
Aktgjykimi ndaj katër ish-krerëve të Ushtrisë Çlirimtare të Kosovës u prit në Prishtinë me një reagim të ashpër politik. Kryetari i Partisë Demokratike të Kosovës, Bedri Hamza, doli para mediave menjëherë pasi Gjykata Speciale në Hagë shqiptoi dënimin ndaj Hashim Thaçit, Kadri Veselit, Jakup Krasniqit dhe Rexhep Selimit, duke e cilësuar ditën e sotme të zezë, të rëndë dhe ditë të turpit për drejtësinë ndërkombëtare.
"Aktgjykimi i sotëm ndaj tyre ka sjellë dhimbje dhe zhgënjim të thellë për të gjithë ne. Një dhimbje dhe zhgënjim që nuk e kemi pritur, madje zemrat tona sot janë me ta dhe familjet e tyre të cilat për gati 6 vite e kanë bartur peshën e këtij procesi. Të lënduar, të zhgënjyer, të mllefosur jemi edhe të gjithë ne qytetarët e Kosovës dhe gjithë shqiptarët në botë. Vendimi i shqiptuar sot, nuk është bërë në emër të popullit të Kosovës por kundër popullit dhe shtetit të Kosovës", tha Hamza.
Ai shtoi se procesin e kishin përcjellë me besimin se drejtësia do të mbështetej vetëm në fakte, prova dhe përgjegjësi individuale, por se, sipas tij, kjo nuk ndodhi.
"Në Hagë sot u godit rëndë rezistenca e popullit tonë, u fyeu sakrifica e popullit tonë që luftoi për liri, mbijetesë dhe çlirim nga regjimi serb që vrau, dëboi dhe terrorizoi shqiptarët e Kosovës. Për ne, ky aktgjykim është një padrejtësi e madhe sepse atje u dënuan ata që jetën e tyre ia kushtuan lirisë që sot e gëzojmë të gjithë në Kosovë. Ata katër sot u dënuan për gjithçka që është propaganduar për luftën e UÇK-së dhe për evidenca rastesh që janë mbyllur nga UNMIK-u dhe EULEX-i gjatë dy dekadave të pasluftës", deklaroi kreu i PDK-së.
Hamza pretendoi se vendimi mbështetet edhe në materiale që partia e tij i konsideron të fabrikuara. "Po ashtu, ai vendim mbështetet edhe në materiale që i konsiderojmë të fabrikuara dhe të ushqyera ndër vite nga aparati shtetëror dhe propaganda e Serbisë për ta kriminalizuar luftën e drejtë të UÇK-së. U dënuan ndër të tjera edhe pse ushtarë të UÇK-së kanë ndaluar serbë në zonat e UÇK-së gjatë luftës. Madje u dënuan edhe për rastet që Tribunali Ndërkombëtar i Hagës kishte shpallur pafajësinë më herët", tha ai.
Sipas Hamzës, vetë paneli gjykues ka folur për probleme serioze me dëshmitë e disa dëshmitarëve, ndërsa ai përmendi edhe shifra dënimesh prej 13, 18 apo 25 vjetësh burgim kur foli për standardin e provës.
Në pjesën historike të deklaratës, kreu i PDK-së tha se aktgjykimi u shqiptua në Hagë, por se historia e Kosovës u shkrua në vend. "Historia jonë është shkruar nga populli ynë që luftoi për mbijetesë, nga mijëra dëshmorë e martirë, nga qindra-mijëra qytetarë të dëbuar nga shtëpitë e tyre dhe nga një aleancë historike me botën demokratike që në vitin 1999 i dha fund represionit dhe spastrimit etnik të regjimit serb në Kosovë", tha ai, duke shtuar se të katërt, gjatë dy viteve të luftës, ishin në koordinim me aleatët dhe se sot u dënuan edhe për këto aleanca.
Hamza theksoi se procesi juridik nuk ka përfunduar. "Sot është ditë e rëndë për Kosovën, por sot nuk përfundon historia. Presim që në Apel të shqyrtohen me saktësi konkluzionet", tha ai, duke përmendur konkluzionet mbi qëllimet e përbashkëta kriminale, përgjegjësinë individuale, autoritetin dhe kontrollin real, si dhe vlerësimin e dëshmive. Ai kërkoi që shteti i Kosovës t'i ndërmarrë të gjitha veprimet e nevojshme për zbardhjen e së vërtetës dhe njoftoi se PDK-ja do të qëndrojë në përkrahje të luftës së UÇK-së dhe të udhëheqësve të saj, duke ndërmarrë veprime demokratike dhe ligjore lidhur me këtë proces.
Trupin gjykues në çështjen ndaj Thaçit, Veselit, Selimit dhe Krasniqit e kryesoi gjyqtari amerikan Charles L. Smith III, i cili edhe e lexoi aktgjykimin e shqiptuar nga Dhomat e Specializuara në Hagë. Smith është emëruar gjyqtar në këtë gjykatë më 7 shkurt 2017 dhe që nga 29 prilli 2020 mban edhe postin e nënkryetarit të saj, si dhe detyrën e gjyqtarit të lartë për ankesat e personelit.
Lidhjet e tij me sistemin e drejtësisë në Kosovë janë më të hershme se vetë Dhomat e Specializuara. Nga viti 2010 deri në 2013 ai shërbeu si gjyqtar i Misionit të Bashkimit Evropian për Sundimin e Ligjit, EULEX, dhe në kuadër të këtij mandati ishte anëtar i Gjykatës Supreme të Kosovës nga viti 2011 deri në 2013. Gjatë asaj periudhe u zgjodh fillimisht nënkryetar e më pas kryetar i Asamblesë së Gjyqtarëve të EULEX-it, sipas biografisë së publikuar në uebfaqen e gjykatës.
Përpara angazhimit në Kosovë, Smith kishte një karrierë të gjatë në Shtetet e Bashkuara. Në vitin 1990 u emërua gjyqtar i Gjykatës së Qarkut në Distriktin e Katërt Gjyqësor të shtetit Iowa, ndërsa nga viti 1996 deri në 2010 ishte kryegjyqtar i atij distrikti dhe njëkohësisht anëtar i Këshillit Gjyqësor të Iowas. Nga viti 1970 deri në 1989 kishte ushtruar profesionin e avokatit privat, me çështje civile e penale, si dhe raste të lidhura me biznesin, tatimet dhe trashëgiminë. Studimet për drejtësi i përfundoi në Universitetin Creighton, ku mori gradën "Juris Doctor" në vitin 1970, po atë vit u pranua në Odën e Avokatëve të Nebraskës dhe një vit më vonë në atë të Iowas. Prej vitit 2014 punon edhe si ndërmjetësues dhe arbitër.
Në Dhomat e Specializuara, Smith ka kryesuar edhe trupin gjykues në çështjen ndaj ish-drejtuesve të OVL-UÇK-së, Hysni Gucati dhe Nasim Haradinaj.
Invalidët e UÇK-së, familjarët e dëshmorëve dhe të të zhdukurve, si dhe viktimat e dhunës seksuale gjatë luftës që jetojnë jashtë vendit lirohen nga tarifat për dokumente. Vendimi i MPJD-së është në fuqi që nga 14 tetori 2026.
