Hamza dorëzon në Kuvend projektligjin që prek Specialen: "Kjo gjykatë nuk na është imponuar"

Nga një konferencë e jashtëzakonshme për media, kryetari i Partisë Demokratike të Kosovës, Bedri Hamza, njoftoi se grupi parlamentar i partisë ka proceduar në Kuvendin e Republikës së Kosovës projektligjin për ndryshimin dhe plotësimin e Ligjit nr. 05/L-053 për Dhomat e Specializuara dhe Zyrën e Prokurorit të Specializuar.

"Grupi parlamentar i PDK-së, posa procedoi në Kuvend kërkesë për plotësim-ndryshimin e ligjit që ka të bëjë me Dhomat e Specializuara", tha Hamza.

Ai e lidhi hapin drejtpërdrejt me atmosferën publike të këtyre ditëve. "Siç e dimë ditët e fundit Kosova po kalon momente të rënda. Në Prishtinë, por edhe në vende të ndryshme qytetarët po mblidhen dhe po reagojnë ndaj aktgjykimit të Dhomave të Specializuara. Një nga thirrjet që është dëgjuar më së shumti ka qenë 'jo në emrin tim'", deklaroi ai, duke theksuar se ky reagim i qytetarëve nuk mund të injorohet dhe se Kuvendi i Kosovës nuk mund të sillet sikur kjo çështje nuk e prek Republikën e Kosovës.

Argumenti qendror i kreut të PDK-së ishte origjina e vetë gjykatës. "Kjo gjykatë nuk na është imponuar nga një rezolutë e Këshillit të OKB-së, është krijuar me Kushtetutën dhe ligjet e Kosovës", u shpreh Hamza, duke shtuar se ajo u themelua me bindjen se do të ishte gjykatë e pavarur, e paanshme dhe e drejtë. Ai vuri në dukje edhe se "Në aktakuzat publike të Dhomave të Specializuara nuk është ngritur një rast lidhur me pretendimet e raportit të Dick Martyt"..

Nisma ligjore vjen pas aktgjykimit dënues të Dhomave të Specializuara ndaj ish-krerëve të Ushtrisë Çlirimtare të Kosovës, Hashim Thaçit, Kadri Veselit, Jakup Krasniqit dhe Rexhep Selimit, një vendim që PDK e ka kundërshtuar publikisht dhe e ka cilësuar si të padrejtë e të papranueshëm.

Sipas shpjegimit të Hamzës, "Projektligji i dorëzuar sot synon ndryshimin dhe plotësimin e kornizës ligjore mbi të cilën funksionojnë Dhomat e Specializuara dhe Zyra e Prokurorit të Specializuar, duke u mbështetur në Kushtetutën e Republikës së Kosovës, Amendamentin nr. 24 të Kushtetutës, marrëveshjet ndërkombëtare përkatëse dhe Aktgjykimin KO26/15 të Gjykatës Kushtetuese".

PDK qëndron në pozicionin se çdo institucion i themeluar me ligjet e Republikës së Kosovës duhet të veprojë në përputhje të plotë me Kushtetutën, ligjet e vendit, standardet ndërkombëtare të drejtësisë dhe garancitë për një proces të drejtë gjyqësor. Përmes kësaj nisme, partia kërkon që Kuvendi ta ushtrojë përgjegjësinë e vet kushtetuese dhe ligjvënëse, duke i shqyrtuar me seriozitet dispozitat që rregullojnë funksionimin e Dhomave të Specializuara.

"PDK do të vazhdojë të ndjekë çdo rrugë demokratike, institucionale dhe ligjore për të kundërshtuar atë që e konsideron padrejtësi ndaj Hashim Thaçit, Kadri Veselit, Jakup Krasniqit dhe Rexhep Selimit dhe për të kërkuar respektimin e plotë të standardeve të drejtësisë në të gjitha fazat e mëtejshme të procesit", theksoi kreu i partisë.