Hamza: 22 nënshkrime gati, por nuk kërkojmë zhbërjen e Gjykatës Speciale

Njëzet e dy nënshkrime, të mbajtura gati në sirtar. Kjo është karta që kryetari i Partisë Demokratike të Kosovës, Bedri Hamza, nxori pas mbledhjes së Kryesisë dhe Grupit Parlamentar të partisë, të mbajtur në ditën pas vendimit dënues të Gjykatës në Hagë ndaj katër ish-pjesëtarëve të Ushtrisë Çlirimtare të Kosovës.

"PDK i ka nënshkrimet e gatshme, domethënë 22 nënshkrime janë të gatshme, dhe varësisht prej nevojave ne do të procedojmë edhe prej situatave të krijuara", deklaroi Hamza në një konferencë për media.

Ai u kujdes të vendosë një vijë të kuqe rreth qëllimit të këtyre nënshkrimeve. Sipas Hamzës, mbledhja e Kryesisë dhe e Grupit Parlamentar nuk u zhvillua për të kërkuar shfuqizimin e gjykatës. "Ne nuk po flasim për zhbërjen e Gjykatës Speciale, po flasim për përshtatjen në një situatë të re", thotë ai.

Kreu i PDK-së theksoi njëkohësisht se partia nuk i ikën obligimeve të marrëdhënieve me këtë gjykatë, përfshirë hetimin e pretendimeve të përmbledhura në raportin e Dick Martyt, autorit të raportit mbi bazën e të cilit u krijua gjykata. "Ne nuk po i ikim obligimit që e kemi marrë, që Gjykata t'i hetojë, t'i prezantojë, t'i faktojë të gjitha gjetjet e raportit të Dick Martyt, për çka edhe është krijuar Gjykata. Dhe çkado që të ketë nga ai raport për trafikime organesh e çështje të tjera, Shtëpinë e Verdhë e dimë që ka qenë objekt i ndërtimit të atij raporti dhe bazë për krijimin e kësaj gjykate, aty do jemi, ne nuk i ikim kësaj përgjegjësie", u shpreh Hamza.

Vendimin e Hagës, ai e cilësoi të papranueshëm në thelb. "PDK sot ka diskutuar situatën pas vendimit të djeshëm të Gjykatës në Hagë. Është një konstatim i përgjithshëm se vendimi është i padrejtë, është i paqëndrueshëm, i pabazuar në fakte. Është një vendim i cili e dëmton historinë, të tashmen dhe të ardhmen e Kosovës. Një vendim i një gjykate e cila e ka devijuar komplet drejtimin e saj në raport me atë se çka është votuar në Kuvend", tha kryetari i PDK-së.

Hamza njoftoi edhe se partia do të kërkojë koordinim me të gjithë spektrin politik, duke argumentuar se çështja e kalon kornizën e një partie të vetme dhe se beson se do të takohet me liderët e të gjitha subjekteve politike. "PDK do t'i bëjë të gjitha përpjekjet e nevojshme që të jemi në komunikim për shkak të ndjeshmërisë së situatës, seriozitetit, situatës ku ndodhet vendi, sepse kjo situatë i jep një mundësi që në të ardhmen, shteti agresor që ka qenë në Kosovë, Serbia, ta përdorë për dëmtimin e Kosovës", tha ai.

Zhvillimi më i drejtpërdrejtë politik ka të bëjë me vetë praninë e PDK-së në sallë. Partia e ka dërguar në Gjykatën Kushtetuese çështjen e konstituimit të Kuvendit dhe kishte bërë të ditur se nuk do të marrë pjesë në seancat e Kuvendit. Tani Hamza lë të hapur rikthimin, nëse thirret një seancë për dënimin e ish-krerëve të UÇK-së.