Hagë: Prokuroria akuzon mbrojtjen e Thaçit se "të bardhën e bën të zezë"

Në sallën e Dhomave të Specializuara të Kosovës në Hagë, beteja e fundit para vendimit po zhvillohet mbi disa orë incizime të vizitave që ish-presidenti Hashim Thaçi ka pritur në paraburgim. Për Prokurorinë e Specializuar, ato regjistrime janë provat bazë të çështjes. Për mbrojtjen, ato nuk provojnë fajësi.

Seanca me fjalët përfundimtare po vazhdon në rastin ku Thaçi, së bashku me katër të bashkëpandehur, po gjykohet për pengim të drejtësisë brenda procesit për krime lufte. Prokurori i specializuar Joshua Hafetz e hapi parashtrimin duke kundërshtuar pikë për pikë atë që mbrojtja kishte thënë një javë më herët.

"Dua të sqaroj për procesverbal pozicionin tonë pas parashtrimeve të mbrojtjes para një jave. Në përgjithësi, sa i takon provave bazë në këtë çështje, dmth. orëve të tëra incizimeve të vizitave të Thaçit, ajo çka dëgjuat nga mbrojtja, zotëri gjykatës, nuk është asgjë tjetër përveç një ri-tjerrje e strategjisë së tyre për ta, përfshirë me atë se çfarë është thënë dhe çfarë është bërë gjatë atyre incizimeve dhe përtej tyre", deklaroi Hafetz.

Sipas tezës së Prokurorisë së Specializuar, Thaçi ka përdorur kontaktet me persona që kishin qasje te dëshmitarët për të përcjellë udhëzime dhe për të ndikuar në atë që ata do të dëshmonin, veprim që prokuroria e cilëson si pjesë të një strategjie për të kontrolluar dëshmitë dhe për të ndihmuar veten.

Hafetz u ndal veçanërisht në leximin që mbrojtja i bën dokumenteve të çështjes, duke e quajtur atë përmbysje të fakteve. "Strategjia rezervë mbetet shpikja e narrativave paralele ku kokën e bëjnë këmbë, të bardhën e bëjnë të zezë dhe ku faqe e faqe e faqe të tëra shtrembërohen. Ndërkohë këto faqe në vetvete nuk janë asgjë tjetër përveç se udhëzime se si duhet që të dëshmonin dëshmitarët e caktuar. Këto i interpreton mbrojtja si ndarje e kujtimeve dhe historive të përbashkëta. Këtë e citoj nga mbrojtja një javë më herët", thotë prokurori.

Ai hodhi poshtë edhe pretendimet që, sipas Prokurorisë, mbrojtja ka ngritur për shërbimet inteligjente dhe për zyrtarë të paraburgimit. "Plani rezervë nga kjo është se kemi një grup të madh të pretendimeve të pavërtetuara në kundërshtim me faktet që përdoret nga mbrojtja. Kemi pretendime të pabazuara lidhur me ide konspirative të shërbimeve inteligjente ose oficerë të pabindur të paraburgimit, të gjitha maskarada për dyshimin e arsyeshëm ose për logjikën normale, por ato as nuk janë të arsyeshme as nuk kanë pikë kuptimi. Aq më pak ato janë të mbështetura në procesverbal të çështjes që ju e keni përpara", tha prokurori i specializuar, duke shtuar: "Kjo ka qenë dhe vazhdon të jetë strategjia".

Mbrojtja e Thaçit i kundërshton këto pretendime. Qëndrimi i saj është se Zyra e Prokurorit të Specializuar nuk i ka vërtetuar pretendimet përtej dyshimit të arsyeshëm, duke e vënë theksin te origjina dhe pesha provuese e disa dokumenteve, si edhe te mënyra e përdorimit të transkripteve. Sipas mbrojtjes, veprimet që përmend Prokuroria nuk përbëjnë veprime të mjaftueshme për të provuar fajësinë e të akuzuarve.