Hagë: 25 vjet për Thaçin dhe Krasniqin, 18 për Veselin, 13 për Selimin

Dënimet u lexuan një pas një në sallën e Dhomave të Specializuara në Hagë: Hashim Thaçi 25 vjet burgim, Jakup Krasniqi 25 vjet, Kadri Veseli 18 vjet dhe Rexhep Selimi 13 vjet. Katër ish-drejtuesit e Ushtrisë Çlirimtare të Kosovës u shpallën fajtorë në procesin që u zhvillua për disa vite në Hagë.

Trupi gjykues e cilësoi ish-kreun e UÇK-së dhe ish-kryeparlamentarin Jakup Krasniqi si "anëtar kyç në zbatimin e qëllimit të përbashkët kriminal", ndërsa për Rexhep Selimin konstatoi se "inkurajoi dhe mori pjesë në kryerjen e krimeve".

Krasniqi ndodhej në paraburgim në Hagë qysh nga nëntori i vitit 2020. Aktakuza ndaj ish-krerëve të UÇK-së ishte konfirmuar më 26 tetor 2020, ndërsa në vitin 2022 ishte dorëzuar aktakuza e ndryshuar.

Gjatë procesit dëshmuan 125 dëshmitarë të ftuar nga Prokuroria, dy dëshmitarë të mbrojtësit të viktimave dhe shtatë të mbrojtjes. Janë pranuar edhe 132 dëshmi me shkrim të dëshmitarëve të Prokurorisë dhe shtatë të mbrojtjes së viktimave. Zyra e Prokurorit të Specializuar e përfundoi zyrtarisht paraqitjen e provave më 15 prill 2025.

Mbrojtja e Hashim Thaçit e ndërtoi rrethin e dëshmitarëve të vet kryesisht mbi figura të diplomacisë dhe ushtrisë ndërkombëtare të fundit të viteve '90. Dëshmitari i parë, më 15 shtator 2025, ishte James Rubin, ish-zëvendëssekretar amerikan i Shtetit dhe bashkëpunëtor i ngushtë i ish-sekretares së Shtetit, Madeleine Albright. Pas tij u thirr Paul Williams, ish-këshilltar ligjor i delegacionit shqiptar në Rambuje. John Stewart Duncan, ish-këshilltar politik i komandantit të lartë të NATO-s, Wesley Clark, dëshmoi më 22 dhe 23 shtator 2025.

Më 30 shtator nisi dëshminë James Peter Covey, ish-zëvendës i përfaqësuesit të OKB-së në Kosovë, Bernard Kouchner, dhe e përfundoi më 2 tetor. Ish-diplomati amerikan Christopher Hill dëshmoi më 10, 11 dhe 12 nëntor 2025, Michael Durkee, ish-këshilltar politik i Wesley Clark, më 12 dhe 13 nëntor, ndërsa Wesley Clark nisi dëshminë më 17 dhe e mbylli më 18 nëntor 2025.

Mbrojtja e Krasniqit hoqi dorë nga dëshmitari i vetëm që do të paraqitej në sallë, duke dorëzuar me shkrim dëshmitë e disa të tjerëve. Kërkesa e mbrojtjes së Thaçit për t'i shtuar Bislim Zyrapin në listën e dëshmitarëve nuk u lejua; u lejua vetëm pranimi i pesë deklaratave të tij të mëhershme, për krahasim dhe vlerësim të qëndrueshmërisë e besueshmërisë së dëshmisë.

Paraqitja e provave nga mbrojtja përfundoi më 2 dhjetor 2025, ndërsa mbyllja e paraqitjes së të gjitha provave në këtë çështje u bë më 18 dhjetor 2025, pasuar nga dorëzimi i dosjeve përfundimtare. Fjala përmbyllëse e Prokurorisë nisi të hënën e 9 shkurtit 2026 dhe përfundoi një ditë më pas, kur kryeprokurorja e specializuar, Kimberly West, kërkoi dënim unik prej 45 vjetësh burgim për secilin nga katër të akuzuarit. Më 10 shkurt e mori fjalën edhe mbrojtësi i viktimave, Simon Laws.