Haga pret orën 10:00: katër ish-krerët e UÇK-së përballë verdiktit, prokuroria kërkon nga 45 vjet

Policia holandeze është vendosur para ndërtesës së Dhomave të Specializuara të Kosovës në Hagë, ku nesër, më 16 shtator, nga ora 10:00, shpallet aktgjykimi i shkallës së parë ndaj katër ish-krerëve të Ushtrisë Çlirimtare të Kosovës. Zyrtarët policorë u kanë kërkuar qytetarëve të mbledhur aty të mos ndalen gjatë, ndërsa njëri prej tyre u ka thënë të pranishmëve se ka marrë urdhër nga komandanti i tij që askush të mos qëndrojë më shumë se dy minuta para ndërtesës së Tribunalit.

Gazetarëve që do ta ndjekin seancën nga brenda, Dhomat e Specializuara u kanë dërguar një email njoftues për praninë policore jashtë. "Siç mund ta dini, në media është raportuar se është bërë thirrje për mobilizimin e një numri të madh njerëzish për të udhëtuar për në Hagë më 15 dhe 16 shtator 2026. Ju informojmë se policia holandeze do të jetë e pranishme jashtë ndërtesës", thuhet në email.

Në bankën e të akuzuarve do të jenë ish-presidenti i Kosovës, Hashim Thaçi, ish-kryetari i Kuvendit, Kadri Veseli, ish-deputeti Rexhep Selimi dhe ish-kryeparlamentari Jakup Krasniqi. Prokuroria e Specializuar ka kërkuar për secilin prej tyre nga 45 vjet burgim për krime lufte. Për Thaçin, Prokuroria ka kërkuar edhe gjashtë vjet shtesë për akuzat që lidhen me pengimin e drejtësisë, ndërsa mbrojtja e tij ka argumentuar se kjo akuzë nuk qëndron. Të katërt i kanë mohuar akuzat dhe janë deklaruar të pafajshëm.

Peshën më të madhe publike gjatë gjykimit e morën dëshmitë që mbrojtja solli nga emra ndërkombëtarë të përfshirë drejtpërdrejt në zhvillimet e viteve 1998-1999. Gjenerali amerikan Wesley Clark, ish-komandant suprem i NATO-s dhe drejtues i fushatës ajrore të Aleancës më 1999 kundër forcave jugosllave, dëshmoi për dy ditë në Hagë. Mesazhi i tij ishte se Thaçi nuk kishte përgjegjësi për aktet individuale të dhunës dhe të hakmarrjes që kishin ndodhur në Kosovë. Clark deklaroi po ashtu se pjesëtarët e UÇK-së nuk ishin terroristë, por njerëz që po luftonin kundër një regjimi të padrejtë dhe për lirinë e vendit. Në fund të dëshmisë, ai tha se edhe pasi e kishte ndjekur procesin gjyqësor, vazhdonte t'i qëndronte bindjes se Thaçi nuk ishte përgjegjës për aktet individuale të dhunës në Kosovë.

Pas tij dëshmoi James Rubin, ish-ndihmëssekretar amerikan i Shtetit, një prej zyrtarëve të përfshirë drejtpërdrejt në diplomacinë amerikane gjatë luftës dhe në negociatat e Rambujesë. Rubin e përshkroi Thaçin si "fytyrën politike" të UÇK-së dhe, sipas dëshmisë së tij, Thaçi nuk kishte kontroll e as komandë efektive mbi komandantët e zonave. Rubin foli edhe për mënyrën se si Shtetet e Bashkuara e shihnin rolin e Thaçit në atë periudhë dhe për raportet mes strukturës politike e asaj ushtarake të UÇK-së.

Në kuadër të çështjes së mbrojtjes dëshmuan edhe Christopher Hill, James Covey, Paul Williams, John Duncan dhe Michael Durkee, diplomatë, ekspertë e ish-zyrtarë ndërkombëtarë me njohuri të drejtpërdrejta për zhvillimet në Kosovë gjatë viteve 1998-1999. Dëshmitë e tyre u përdorën nga mbrojtja për të paraqitur versionin e saj për strukturën e UÇK-së dhe për rolin e Thaçit e të akuzuarve të tjerë. Në anën tjetër, Prokuroria ka paraqitur gjatë procesit pretendimet e veta.