Haga hap dyert për dëshmitë e LDK-së dhe FARK-ut në mbrojtje të Jakup Krasniqit

Mbrojtja e Jakup Krasniqit ka fituar një betejë procedurale në Gjykatën Speciale: Trupi Gjykues ka pranuar si prova dëshmitë e dy dëshmitarëve, një ish-zyrtari të Lidhjes Demokratike të Kosovës (LDK) dhe një ish-komandanti të Forcave të Armatosura të Republikës së Kosovës (FARK), identitetet e të cilëve mbeten të fshehura në dokumentin e bërë publik.

Vendimi mban datën 3 tetor 2025 dhe i përgjigjet një kërkese të mbrojtjes nga tetori i atij viti. Me të, paneli i gjykatësve miratoi kërkesën që dy dëshmitë të futen në dosjen e çështjes që Zyra e Prokurorit të Specializuar (ZPS) ka ngritur kundër Krasniqit.

E para ka të bëjë me vitet 1997 dhe 1998. Sipas panelit, mbrojtja synon ta përdorë deklaratën e ish-zyrtarit të LDK-së për të sqaruar krijimin e sistemeve paralele të arsimit dhe shëndetësisë, pjesëmarrjen e Krasniqit në LDK dhe aktivitetet e tij në ato vite, si dhe mënyrën se si ai i perceptonte anëtarët dhe politikat e partisë. Trupi Gjykues e vlerësoi këtë deklaratë si relevante, në shikim të parë autentike dhe të besueshme, me vlerë provuese.

Bashkë me deklaratën u pranua edhe një dokument i LDK-së, në të cilin Krasniqi kishte shprehur pakënaqësi për mënyrën e zgjedhjes së lidershipit të partisë gjatë asaj periudhe. Sipas vendimit, kur dokumenti iu paraqit dëshmitarit, ky komentoi se në atë kohë nuk ishte pajtuar me metodat e përdorura për zgjedhjen e udhëheqjes. Gjykatësit e cilësuan dokumentin si pjesë të pandashme të dëshmisë dhe shënuan se ai është i datuar dhe i nënshkruar. Duke qenë se ZPS nuk e kundërshtoi pranimin e tij, dhe se palët e tjera dhe Mbrojtësi i Viktimave do të kenë mundësi ta marrin në pyetje dëshmitarin, paneli arriti në përfundimin se "vlera provuese e dokumentit nuk tejkalohet nga ndonjë efekt paragjykues". Dokumenti u pranua në bazë të rregullave 138(1) dhe 154.

Dëshmia e dytë zhvendos vëmendjen te marrëdhëniet mes dy formacioneve të armatosura shqiptare. Ish-komandanti, të cilin Trupi Gjykues e përshkruan si ish-oficer profesionist ushtarak, iu bashkua FARK-ut "nën komandën e Ministrisë së Mbrojtjes të qeverisë në mërgim të vetëshpallurës Republika e Kosovës, të drejtuar nga Ahmet Krasniqi".

Mbrojtja kërkon të mbështetet në deklaratat e tij për katër çështje: themelimin e FARK-ut dhe hyrjen e pjesëtarëve të tij në Kosovë, marrëdhëniet dhe linjat e komunikimit mes UÇK-së dhe FARK-ut gjatë periudhës që mbulon aktakuza, përpjekjet për bashkimin e dy forcave dhe qëndrimin e Krasniqit ndaj FARK-ut. Për të njëjtin qëllim u kërkua pranimi i disa dokumenteve të ofruara nga ky dëshmitar, që tregojnë raportet UÇK-FARK. Mbrojtja argumentoi se këto prova janë relevante, në pamje të parë autentike dhe të besueshme, si dhe të përshtatshme për pranim sipas Rregullës 154. ZPS nuk kundërshtoi as këtë pjesë.

Trupi Gjykues nuk i pranoi pa rezerva të gjitha përmbajtjet. Në pikën 27 të vendimit, ai vëren se deklaratat përmbajnë edhe informacione pa lidhje me çështjen ose me relevancë të kufizuar. Megjithatë, gjykatësit u bindën se ato përmbajnë edhe "informacione relevante për këto procedura, veçanërisht lidhur me rrethanat kontekstuale, marrëdhëniet ndërmjet udhëheqësve të UÇK-së dhe FARK-ut, disa veprime që i atribuohen z. Krasniqit, si dhe rolin e tij brenda UÇK-së", dhe për këtë arsye i shpallën relevante për akuzat e aktakuzës.