Gurë drejt zyrave të EULEX-it në Fushë Kosovë, policia mbyll hyrjen për automjete

Gurët kanë nisur të fluturojnë drejt objektit të EULEX-it në Fushë Kosovë. Protestuesit e mbledhur para zyrave të misionit evropian, të revoltuar pas vendimit dënues të Gjykatës Speciale në Hagë ndaj ish-krerëve të Ushtrisë Çlirimtare të Kosovës, kanë nisur të gjuajnë me gurë në drejtim të ndërtesës, duke e tensionuar protestën.

Në vendngjarje janë pjesëtarë të Policisë së Kosovës, të angazhuar për sigurimin e objektit dhe për menaxhimin e situatës. Nuk raportohet ende për të lënduar apo arrestime.

Paralelisht, policia ka mbyllur hyrjen për automjete në Fushë Kosovë, sipas informacioneve të agjencisë KosovaPress. Pasojat ndihen në aksin kryesor: kolona të gjata automjetesh janë krijuar përgjatë rrugës Pejë-Prishtinë, nga Komorani deri në Fushë Kosovë, në drejtim të Prishtinës. Në pamjet e publikuara shihen vetura me qytetarë që mbajnë flamurë, të bllokuar në autostradë në Komoranë.

Një grup i vogël qytetarësh vazhdon të qëndrojë para selisë së EULEX-it. Protestat e qytetarëve kanë shpërthyer pas vendimit dënues të Gjykatës Speciale ndaj ish-krerëve të UÇK-së.