Gucati: Do t'i mbështesim protestat, por pa dhunë, Kosova s'guxon të dëmtohet

"Kosova është e juaja." Me këtë fjali kryetari i Organizatës së Veteranëve të Luftës së UÇK-së (OVL-UÇK), Hysni Gucati, ka tërhequr vijën e kuqe të mbështetjes që organizata u jep protestave: po për daljen në rrugë, jo për dhunën.

Gucati deklaroi se OVL-UÇK-ja do të vazhdojë të mbështesë protestat popullore dhe se do të përkrahë edhe protestën e studentëve, si dhe çdo protestë tjetër të organizuar në mbështetje të kërkesave të tyre.

"OVL e UÇK-së gjithmonë do të jetë në mbështetje të çdo iniciative të protestave popullore. Protestat që ne dëshirojmë janë protesta jo të dhunshme, jo të kallim vendin, sepse Kosova është e juaja", tha ai.

Duke kujtuar sakrificën e bërë për vendin, Gucati theksoi se Kosova nuk duhet të dëmtohet nga protestat. "Serbia e ka kallur vendin, ne e kemi shëruar. Ne s'jemi me kallë vendin, por me mbrojtë, sepse e kemi ndërtuar me gjak e me mund", deklaroi ai.

Kreu i organizatës së veteranëve paralajmëroi njëkohësisht se tema e protestave mbetet e hapur brenda OVL-UÇK-së, madje edhe me mundësinë që organizata të mbajë një protestë të vetën.

"Protestën e studentëve sot do ta mbështesim dhe përkrahim, dhe çdo protestë ne do ta përkrahim. Shpresojmë që një ditë, dhe ne do ta mbajmë një. Nesër e kemi kryesinë dhe do të ulemi dhe nuk do të ndalemi me protesta", tha Gucati.

Kërkesat konkrete të studentëve nuk u shtjelluan në deklaratën e tij. Vendimet e kryesisë së OVL-UÇK-së për hapat e mëtejshëm priten nesër.