Greva në shkollat e Prishtinës: "Pastrimi" hyn në klasa, sindikata flet për shkelje ligjore

Punëtorët teknikë të shkollave të Prishtinës janë ende në grevë, por klasat e disa shkollave fillore të kryeqytetit u pastruan gjithsesi. Këtë punë e bëri Kompania Rajonale e Mbeturinave (KRM) "Pastrimi", dhe sindikata e punëtorëve e cilëson atë si thyerje të grevës.

Më 21 tetor, KRM "Pastrimi" njoftoi se kishte nisur aktivitete pastrimi nëpër shkollat fillore: "Po i pastrojmë klasat e shkollave fillore në Kryeqytet në mënyrë që objektet mësimore të jenë të pastra për mësim".

Jusuf Azemi, kryetari i Sindikatës së Pavarur të Sektorit Privat të Kosovës (SPSPK), e kundërshtoi ashpër këtë veprim. Sipas tij, kompania hyri në shkolla në orët kur punëtorët ishin në pushim, ndërkohë që vetë qyteti ka probleme me mbeturinat. "Megjithatë kemi edhe informacione që gjatë natës së kaluar, kur punëtorët kanë shkuar në pushim, kompania KRM ‘Pastrimi’ ka shkuar nëpër disa shkolla që ta bëjë pastrimin e këtyre shkollave, kur dihet se pastrimi në çfarë gjendjeje kundërmon qytetin, ai nuk po mund me i kry detyrat e veta, apo shkon e po i kryen detyrat tjera. Është shkelje ligjore", tha Azemi.

Sindikata, sipas tij, e ka tashmë çështjen në gjykatë, dhe veprimet e fundit të kompanisë do të përfshihen në lëndë. "Ne e kemi lëndën në gjykatë dhe normal që këtij materiali, këto veprime që i kanë bë dje do t'ia bashkëngjisim edhe lëndës kur të kemi çështjen e gjykimit", deklaroi ai.

Tensioni arriti kulmin në shkollën "Naim Frashëri". Azemi tha se aty shkuan punëtorë të KRM "Pastrimi" ose të Ndërmarrjes Publike Banesore, pa qenë ende i sigurt se cilës ndërmarrje i përkisnin, dhe se pati një konflikt mes punëtorëve, në të cilin ndërhyri policia. Rrethanat e sakta të incidentit mbeten të paqarta. "Sot në shkollën ‘Naim Frashëri’ kanë shkuar punëtorët e KRM ‘Pastrimi’ ose të Ndërmarrjes Publike Banesore, nuk jam i sigurt, por që do ta verifikojmë, pasi i kemi të incizuar. Dhe aty duket se ka pas një konflikt mes punëtorëve, me çka edhe ka ndërhyrë policia, mirëpo nuk jemi në dijeni të situatës, por që më vonë do t’i kemi informatat e plota. Ta bësh thyerjen e grevës në këtë formë, gjithkush duhet ta japë llogari për këto thyerje që po bëhen", tha ai.

Në thelb të mosmarrëveshjes mbetet paraja. Azemi fajëson Komunën e Prishtinës se nuk i ka përmbushur obligimet financiare ndaj kompanive që menaxhojnë punëtorët teknikë të shkollave fillore dhe të mesme, aq sa disa prej tyre janë detyruar t'i paguajnë punëtorët nga buxheti i vet. "Dje gjatë gjithë ditës kemi pasur kontakte me pronarë të kompanive që i menaxhojnë këta punëtorë, të shkollave fillore dhe shkollave të mesme, njëfarë forme edhe në gjendje të rëndë, sepse ka kompani që nga buxheti i vet ka paguar mjete për të cilat Komuna e Prishtinës nuk ia ka bartë dhe fajtori kryesor dihet, që është Komuna e Prishtinës", tha ai.

Sindikata kërkon zgjidhje afatgjatë, jo vetëm një mbulim të përkohshëm. Në orët e vona të pasdites, përfaqësuesit e saj u ulën me shefin e kabinetit të kryetarit të Komunës së Prishtinës. Azemi e përshkroi qëndrimin e tyre në takim si të prerë: "Në fakt, ne kemi shkuar shumë komod, sepse u kemi thënë që ne nuk kemi çka të shtojmë më shumë, nëse keni të na ofroni diçka, nëse jo - ditën e mirë dhe nëse juve ju vjen mirë që shkollat janë në këtë gjendje, atëherë vazhdoni".