Gratë e UÇK-së në sheshin e Prishtinës: "Ne luftuam bashkë", ndërsa Haga pritet të shpallë verdiktin

Në sheshin "Skënderbeu" në Prishtinë, disa gra ish-luftëtare të Ushtrisë Çlirimtare të Kosovës kanë ngritur zërin në mbështetje të katër ish-krerëve të UÇK-së që gjykohen në Hagë, me një mesazh të përqendruar në një ide: lufta ishte e përbashkët, dhe po ashtu duhet të jetë edhe përgjegjësia për të.

Veterania e luftës së UÇK-së, Shyhrete Kastrati, e cilësoi procesin në Hagë si një çështje që nuk i përket vetëm të akuzuarve. "Ne luftuam bashkë, ne e fituam lirinë bashkë. Sot nuk kemi dalë në shesh vetëm për të kërkuar drejtësi, por edhe për të dëshmuar se edhe ne ishim aty, bashkë me ata të cilët sot po gjykohen dhe po mbahen në Hagë", tha ajo në fjalimin e mbajtur para protestueseve.

Kastrati theksoi se ish-krerët e UÇK-së që po gjykohen në Hagë nuk mund të ndahen nga bashkëluftëtarët me të cilët ndanë luftën dhe fatin e Kosovës. Sipas saj, gratë qenë pjesë e të gjitha proceseve gjatë luftës, në aspektin ushtarak dhe në atë politik: në frontet e luftës, në spitalet ushtarake në male, në rrugët e Kosovës dhe pranë popullit në ditët më të vështira.

"Duke qenë pjesë e së njëjtës luftë, bashkëluftëtarët tanë të Ushtrisë Çlirimtare të Kosovës që sot po gjykohen në Hagë, i bëjmë me dije se ne luftuam, sakrifikuam dhe rrezikuam bashkë për të njëjtin qëllim: lirinë e Kosovës", shtoi ajo.

Kastrati tha se pjesëtarët e UÇK-së, me vullnet të lirë, i thanë jo robërisë dhe nënshtrimit serb, duke sakrifikuar rininë, familjen dhe jetën për një Kosovë të lirë. Procesi gjyqësor, sipas saj, nuk është vetëm proces ndaj Hashim Thaçit, Kadri Veselit, Jakup Krasniqit dhe Rexhep Selimit, por prek të gjithë ata që ishin pjesë e luftës çlirimtare. Aty, theksoi ajo, po preket një pjesë e historisë së Kosovës, dhe padrejtësia ndaj ish-krerëve të UÇK-së është dhimbje për ata, për familjet e tyre dhe për të gjithë ata që luftuan për lirinë e vendit.

Protesta e grave veterane vjen pas marshit për liri që u mbajt të shtunën në Prishtinë, në prag të verdiktit final për ish-krerët e UÇK-së në Hagë.

Ndërkohë, debati publik në Kosovë është zhvendosur edhe në terrenin juridik të aktakuzës. Avokati Ardian Bajraktari ka publikuar një analizë mbi procesin gjyqësor ndaj ish-krerëve të UÇK-së, në të cilën argumenton se Zyra e Prokurorit të Specializuar nuk ka arritur të provojë përtej dyshimit të arsyeshëm ekzistencën e një "Ndërmarrjeje të Përbashkët Kriminale", as pjesëmarrjen individuale të Thaçit, Veselit, Selimit dhe Krasniqit.

Sipas Bajraktarit, ekzistenca e krimeve, pozitat drejtuese apo autoriteti politik dhe ushtarak i të akuzuarve nuk janë të mjaftueshme për të dëshmuar një qëllim të përbashkët kriminal. Prokuroria, thotë ai, do të duhej të provonte konkretisht qëllimin kriminal, pjesëmarrjen e secilit të akuzuar, kontributin e tyre në realizimin e këtij qëllimi dhe nivelin përkatës të fajësisë.