Granit Xhaka dënohet me urdhër penal në Zvicër: 150 mijë franga gjobë me kusht

Granit Xhaka, kapiteni i Kombëtares së Zvicrës, është dënuar me urdhër penal nga Prokuroria në Zvicër për përfitimin e një vërtetimi të rremë. Këtë e ka bërë të ditur vetë mesfushori shqiptar në një deklaratë publike, ku thotë se e pranon vendimin dhe merr përsipër përgjegjësinë.

Sipas deklaratës së tij, dënimi përbëhet nga 50 ditë-gjobë, me 3 000 franga zvicerane për secilën ditë, gjithsej 150 mijë franga. Megjithatë, ai është shqiptuar me kusht dhe me një periudhë prove prej dy vitesh: gjoba nuk ekzekutohet për sa kohë që Xhaka nuk kryen ndonjë vepër tjetër penale gjatë kësaj periudhe. Se çfarë vërtetimi konkretisht kishte në qendër çështja, nuk është bërë publike.

Xhaka ishte marrë në pyetje në kuadër të kësaj çështjeje. Ai tha se ka dhënë dëshminë e plotë para Prokurorisë, se vendimi tashmë është përfundimtar dhe se shpenzimet e procedurës janë paguar.

"E pranoj vendimin dhe marr përgjegjësinë. Qëndroj pas asaj që kam thënë disa javë më parë", deklaroi Xhaka.

Futbollisti iu drejtua edhe atyre që i kishin dalë në krah gjatë kësaj kohe: "Faleminderit për mesazhet e shumta mbështetëse që kam marrë gjatë javëve të fundit. Për mua kanë shumë rëndësi".