Glock me 14 fishekë në çantë te Rrethi i Fontanës, policia ndalon veturën me targa 01

Në çantën e dorës ndodhej një pistoletë Glock, kalibër 9x19 mm, me një karikator dhe 14 fishekë. Kontrolli te "Rrethi i Fontanës" në Prishtinë, mbrëmjen e së dielës, ka përfunduar me sekuestrimin e armës, të municionit dhe të dokumentacionit për armë.

Rasti ndodhi më 13 shtator, rreth orës 21:30. Njësitet policore, që ndodheshin në një pikë kontrolli, ndaluan një veturë Mercedes me targa 01, e cila drejtohej nga një 26-vjeçar, A.B. Pas gjetjes së armës, i dyshuari u shoqërua në stacion policor, ku u intervistua në cilësinë e të dyshuarit.

Arma, karikatori dhe municioni u sekuestruan. I dyshuari posedonte leje për armë shenjëtarie, e cila po ashtu i është sekuestruar, por në momentin e kontrollit nuk e kishte me vete librezën që lejon daljen me armë.

Për rastin është njoftuar Prokurori i Shtetit, me vendim të të cilit është iniciuar procedura për "Mbajtje në pronësi, kontroll apo posedim të paautorizuar të armëve". Pas përfundimit të procedurave, 26-vjeçari është liruar në procedurë të rregullt.

I dyshuari prezumohet i pafajshëm derisa fajësia të provohet me vendim të formës së prerë nga gjykata.