ReklamëHapësirë reklame
ReklamëHapësirë reklame
Reklamë
Gjykimi ndaj Nagip Krasniqit, ish-kryeshefit të KEK-ut, u ndal sapo kishte nisur: mbrojtja kërkoi largimin e kryetares së trupit gjykues dhe vetë gjyqtarja tha se kërkesa ka bazë. Në qendër të aktakuzës janë mbi 3,2 milionë euro dëm për KEK-un dhe tregtia me një kompani sllovene pa licencë në Kosovë.
Gjykimi ndaj ish-kryeshefit ekzekutiv të Korporatës Energjetike të Kosovës (KEK), Nagip Krasniqi, u ndërpre të enjten në Gjykatën Themelore në Prishtinë, pasi kryetarja e trupit gjykues, gjyqtarja Violeta Namani-Hajra, pranoi se ka bazë për përjashtimin e saj nga rasti.
Kërkesën e ngriti mbrojtja. Avokati i Krasniqit, Vyrtyt Ibrahimaga, tha se kanë dalë rrethana të reja: disa nga provat në këtë proces janë marrë nga një rast tjetër i klientit të tij, në të cilin Namani-Hajra kishte qenë gjyqtare e procedurës paraprake. Sipas tij, për sa kohë ekziston një rrethanë e tillë, mbrojtja është e detyruar të kërkojë largimin e kryetares së trupit gjykues.
Prokurori i rastit, Dren Paca, deklaroi se nuk kishte qenë në dijeni se kush kishte gjykuar në procedurën paraprake të lëndëve të tjera. Ai pranoi se një pjesë e provave vijnë nga rasti tjetër, por theksoi se kjo, nga ana procedurale, nuk përbën asnjë pengesë.
Gjyqtarja Namani-Hajra e pa ndryshe. Ajo tha se, duke u bazuar në rrethanat e reja të paraqitura nga mbrojtja, është e kuptueshme që ka bazë për përjashtimin e saj. Seanca u ndërpre aty. Përveç saj, trupin gjykues e përbëjnë gjyqtarët Medie Bytyqi dhe Vesel Ismaili. Nuk dihet ende se kur do të rifillojë gjykimi.
Paca, i cili përfaqëson akuzën në këtë rast, është caktuar ushtrues i detyrës së kryeprokurorit të Prokurorisë Speciale të Republikës së Kosovës, pas shkarkimit të Blerim Isufajt nga KPK-ja.
Aktakuza e Prokurorisë Speciale u ngrit më 19 gusht 2024 dhe e ngarkon Krasniqin me veprën penale "Keqpërdorimi i pozitës apo autoritetit zyrtar". Në seancën fillestare, më 8 tetor 2024, ai u deklarua i pafajshëm.
Sipas prokurorisë, duke filluar nga 15 tetori 2021 e në vazhdim, Krasniqi, në cilësinë e kryeshefit të KEK-ut, me dashje ka aprovuar blerje, ka nënshkruar kontrata dhe ka autorizuar nënshkrimin e tyre, si dhe ka konfirmuar vazhdimin e tregtisë me operatorin ekonomik slloven Holding Slovenske Elektrane SE (HSE). Aktakuza pretendon se ai e bëri këtë duke e ditur se me këtë kompani nuk mund të tregtohej energji elektrike për sa kohë ajo nuk licencohej, ose nuk i njihej licenca, nga Zyra e Rregullatorit për Energji (ZRrE), në kundërshtim me Ligjin për Energjinë Elektrike dhe Ligjin për Rregullatorin e Energjisë.
Pasojat, sipas prokurorisë, janë të shumëfishta. Operatorit slloven i është mundësuar përfitim pasuror dhe shmangie nga pagesat tatimore në Kosovë, duke e dëmtuar buxhetin e shtetit për 531 mijë e 920 euro e 79 centë. Njëkohësisht janë dëmtuar dhe diskriminuar operatorët e tjerë konkurrentë, të cilët ishin të licencuar dhe u nënshtroheshin detyrimeve tatimore. Dëmi material ndaj vetë KEK-ut, sipas aktakuzës, është në shkallë të madhe: 3 milionë e 229 mijë e 905 euro.
Aktakuza përshkruan edhe një seri paralajmërimesh nga rregullatori. ZRrE kishte reaguar disa herë përmes shkresave dhe postës elektronike zyrtare, i kishte shqiptuar KEK-ut dënim për shkeljet në blerjen e energjisë dhe, më 19 gusht 2022, kishte monitoruar tregtinë në kohë reale, duke vërejtur se korporata vazhdonte të vepronte në kundërshtim me ligjin.
Brenda KEK-ut, sipas prokurorisë, grupi punues ishte pajtuar t'i respektonte të gjeturat e rregullatorit. Në qëndrimin e tij shkruhej: "Pavarësisht bindjeve dhe argumenteve të cekura më lartë, KEK do të respektojë përfundimisht qëndrimet e ZRrE-së, si një institucion i thirrur për rregullim të sektorit të energjisë i emëruar nga Kuvendi i Republikës së Kosovës sipas legjislacionit në fuqi, i cili i jep këtë kompetencë. Në këtë rast, KEK do të ndërpresë tregtimin energjisë me tregtarë që nuk prezantojnë licencë apo dëshmi nga ZRrE që e dëshmojnë që nuk kanë licencë meqë janë shtjerrë të gjitha mundësitë me komunikimet që kemi pasur me ZRrE".
Mirëpo, sipas prokurorisë, kjo përgjigje nuk iu dërgua rregullatorit e plotë, por vetëm me komentet mospajtuese. "Sipas përgjigjes së lartcekur rezulton se ZRrE-së nuk i ishin përcjellë qëndrimet e grupit punues të KEK, por qëndrimi personal i Nagip Krasniqit", thuhet në aktakuzë.
Prokuroria pretendon gjithashtu se edhe zyra ligjore e KEK-ut, në një opinion ku Krasniqi ishte në kopje, i kishte dhënë të drejtë ZRrE-së. Departamenti i Menaxhimit të Tregtimit me Energjinë në KEK i kishte kërkuar pastaj Krasniqit konfirmim nëse duhej vazhduar tregtia me HSE. Të gjitha këto janë pretendime të akuzës, të cilat do të provohen ose rrëzohen në gjykim, ndërsa Krasniqi i mohon akuzat.
Pas vitesh pritjeje, mosmarrëveshja për qindra miliona euro të paguara nga buxhetet komunale arriti në fazën e parë dëgjimore. Drejtori ekzekutiv i AKK-së, Sazan Ibrahimi, thotë se niveli qendror as që u paraqit.
