Gjykimi për vrasjen e rreshterit Muhamet Lika: gjashtë të akuzuar para trupit gjykues në Ferizaj

Ishte rreth orës 23:00 të 1 prillit 2025 kur rreshteri i Policisë së Kosovës, Muhamet Lika, u vra në hyrjen e ndërtesës ku banonte, në rrugën "Idriz Seferi" në Kaçanik. Ai sapo kishte përfunduar ndërrimin dhe po kthehej në banesën e tij. Në vendin e ngjarjes u gjetën katër gëzhoja të kalibrit 9.19 milimetra.

Në Gjykatën Themelore në Ferizaj, sot nga ora 10:45, vazhdon shqyrtimi gjyqësor për këtë vrasje. Para trupit gjykues pritet të paraqiten Haki Bela, Rilind Murati, Vatan Çaka, Edmond Lika, Shkëlqim Kuka dhe Diamant Gashi. Pesë të akuzuarit e parë ngarkohen me veprën penale "Vrasje e rëndë", ndërsa Gashi akuzohet për dhënie të ndihmës kryerësve pas kryerjes së veprës penale. Të gjithë janë deklaruar të pafajshëm ndaj akuzave që u vihen në barrë.

Sipas pretendimeve të Prokurorisë, vrasja ishte planifikuar paraprakisht dhe dyshohet se kishte lidhje me punën e Likës si zyrtar policor. Në aktakuzë pretendohet se të pandehurit, në bashkëveprim edhe me një person që në kohën e krimit ishte i mitur, e kishin përcjellë rreshterin nga dalja e Stacionit Policor deri te ndërtesa ku jetonte. Prokuroria pretendon se Edmond Lika dhe Shkëlqim Kuka kishin ndjekur lëvizjet e tij pasi ai kishte dalë nga stacioni policor.

Sipas dosjes së Prokurorisë, i mituri dyshohet se kishte shkuar pas rreshterit dhe kishte shtënë në drejtim të tij me armë zjarri. Ndaj tij procedura penale zhvillohet veçmas. Diamant Gashi, nga ana e tij, akuzohet se kishte kontaktuar Haki Belën dhe se të miturit të dyshuar për të shtënat i ishte siguruar strehim, ushqim dhe ndihmë pas krimit.

Raporti i autopsisë kishte konstatuar se vdekja e Likës ishte e dhunshme dhe kishte ardhur nga gjakderdhja e brendshme dhe e jashtme, si pasojë e dëmtimit të mushkërive dhe mëlçisë nga predhat e armës së zjarrit.

Në seancën e sotme pritet të vazhdojë administrimi i provave dhe dëgjimi i dëshmitarëve. Prokuroria ka paralajmëruar se gjatë procesit do të paraqesë videoincizime, prova materiale dhe dëshmi, me pretendimin se ato tregojnë përgatitjen dhe rolin e secilit të akuzuar para, gjatë dhe pas vrasjes.