Gjykatësi në Hagë: Ky proces nuk gjykon UÇK-në, por përgjegjësinë personale të të akuzuarve

Në sallën e gjyqit në Hagë, kryesuesi i Panelit të Trupit Gjykues, Charles L. Smith III, nisi me një paralajmërim drejtuar të pranishmëve dhe vazhdoi me përcaktimin e kufijve të vetë procesit.

"U kërkojmë me mirësjellje personave të qëndrojnë në heshtje. Mbani parasysh që këtu jemi në gjykatë dhe po shqyrtojmë çështje të rëndësishme. Çdo prishje e qetësisë do të çojë në marrjen e masave nga gjykata", tha Smith.

Duke sqaruar se çfarë është objekt gjykimi, ai theksoi se çështja lidhet me veprimet dhe sjelljet e të akuzuarve, jo me vlerësimin e luftës çlirimtare. "Kjo çështje gjyqësore ka të bëjë me veprimet dhe sjelljet e të akuzuarve që lidhen me këtë çështje. Nuk ka të bëjë me legjitimitetin e UÇK-së dhe synimin e saj për një Kosovë të pavarur", u shpreh ai.

Sipas Smithit, procesi nuk është as një peshore mes palëve të konfliktit. "Kjo çështje gjyqësore nuk ka të bëjë me vlerësimin e përgjegjësive të njërës palë kundër atyre të palës tjetër. Nuk ka të bëjë me veprimet e forcave paramilitare dhe ushtarake që, padyshim, forcat serbe kryen kundër shqiptarëve të Kosovës", deklaroi kryesuesi i panelit.

Ai përjashtoi gjithashtu çdo lexim të gjerë politik apo pretendim të përgjithshëm për vetëmbrojtje: "Kjo çështje nuk ka të bëjë me çfarëdo pretendimi për vetëmbrojtje. Kjo çështje ka të bëjë vetëm me pyetjen nëse janë kryer krimet e pretenduara në aktakuzë dhe nëse mund të mbahen penalisht të akuzuarit përgjegjës për këto".

Smith specifikoi se bëhet fjalë për krime të pretenduara kundër serbëve, romëve dhe shqiptarëve të Kosovës, të cilat aktakuza i lidh me pjesëtarë të UÇK-së dhe me të akuzuarit. Akuzat mbeten pretendime derisa gjykata të vendosë.

"Lidhur me këtë aspekt, përgjegjësia e të akuzuarve është vetëm personale. Ky parim mishërohet në kornizën ligjore të Dhomave të Specializuara", përfundoi ai.