Gjykata Supreme bllokon rregullin e postës që kufizon votimin me postë në 2026

Një rregull i Shërbimit Postar të Shteteve të Bashkuara që do të kufizonte votimin me postë në zgjedhjet e ardhshme të mesit të mandatit mbetet i bllokuar. Gjykata Supreme e SHBA-së refuzoi të hënën në mbrëmje kërkesën e administratës Trump për ta hequr ndalesën gjyqësore ndaj tij.

Në vendimin e saj, Gjykata Supreme deklaroi se administrata "nuk ka gjasa të ketë sukses në themel të kundërshtimit të saj ndaj" urdhrit paraprak të lëshuar nga një gjyqtar i Gjykatës Federale të Distriktit, i cili e bllokoi rregullin.

Gjyqtari i Gjykatës Supreme, Brett Kavanaugh, i emëruar nga presidenti Donald Trump, u pajtua me vendimin përmes një deklarate ku shkroi se "ekziston të paktën një perspektivë e arsyeshme që rregulli përfundimtar të bjerë brenda autoritetit ligjor të Shërbimit Postar".

Megjithatë, ai e ndau qëndrimin për afatet. "Por zbatimi i rregullit në zgjedhjet e vitit 2026 do të ishte arbitrar dhe kapriçioz, në shkelje të Ligjit për Procedurën Administrative, sepse zyrtarët shtetërorë dhe lokalë të zgjedhjeve nuk kanë kohë të mjaftueshme për ta zbatuar në mënyrë të arsyeshme rregullin para zgjedhjeve", shtoi Kavanaugh. "Për këtë arsye, pajtohem me refuzimin e kërkesës për pezullim."

Dy gjyqtarë konservatorë të gjykatës me nëntë anëtarë, Samuel Alito dhe Clarence Thomas, kundërshtuan vendimin për të refuzuar pezullimin e urdhrit ndaj rregullit të Shërbimit Postar.

Me këtë vendim, rregulli mbetet jashtë fuqie ndërsa procesi gjyqësor për ligjshmërinë e tij vazhdon, çka do të thotë se ai nuk do të ndikojë mbi mënyrën si votohet me postë në zgjedhjet e vitit 2026.