Gjykata në Tiranë rrëzon prokurorinë: të paligjshme arrestimet e 22 protestuesve

Arrestimet e 22 personave gjatë një proteste në Tiranë janë të paligjshme. Në këtë përfundim arriti Gjykata e Shkallës së Parë e Juridiksionit të Përgjithshëm Tiranë, e cila të enjten, më 22 tetor, rrëzoi thuajse të gjitha kërkesat e prokurorisë për protestuesit e ndaluar nga policia.

Prokuroria i kishte kërkuar gjykatës dy gjëra: të vlerësonte si të ligjshëm ndalimin e protestuesve dhe të caktonte ndaj tyre masa sigurimi personal. Në pjesën dërrmuese të rasteve, gjyqtarët nuk i pranuan as njërën, as tjetrën.

Vendimet u morën gjatë tre seancave të veçanta, të zhvilluara të gjitha të enjten. Nuk është bërë ende e ditur se për cilët nga të ndaluarit gjykata u dha të drejtë kërkesave të prokurorisë, duke qenë se ato u rrëzuan thuajse, por jo tërësisht.

Vendimi i gjykatës vë në qendër të vëmendjes mënyrën se si u kryen ndalimet gjatë protestës, në një çështje ku tani pritet qëndrimi i prokurorisë ndaj vendimeve të shkallës së parë.