Gjashtë të vrarë në sulmet ruse në Ukrainë, 37 të plagosur në rajonin e Odesës

Dy njerëz u vranë kur një goditje ruse ra mbi një dyqan ushqimor në qytezën e Zvjahelit, në rajonin e Zhytomirit, në perëndim të Kievit. Guvernatori i rajonit, Vitalij Bunechko, tha se në shënjestër u morën edhe dy pika karburanti, si dhe një ndërmarrje me investime të huaja e paidentifikuar.

Ishte vetëm një pjesë e bilancit të së shtunës. Sipas autoriteteve ukrainase, sulmet ajrore ruse në disa rajone të vendit vranë gjashtë persona, plagosën dhjetëra të tjerë dhe dëmtuan ndërtesa banimi e infrastrukturë në mbarë Ukrainën.

Presidenti i Ukrainës, Volodimir Zelenski, njoftoi për sulme mbi qytetin juglindor të Zaporizhias dhe mbi Krivi Rihun, qytetin e tij të lindjes. Guvernatori i rajonit të Zaporizhias, Ivan Fedorov, tha se dy persona u vranë dhe 11 u plagosën në sulmet ndaj Zaporizhias dhe disa vendbanimeve të tjera. Në Krivi Rih, kreu i administratës ushtarake, Oleksandr Vilkul, tha se dy persona humbën jetën gjatë sulmeve të natës me dronë dhe raketa.

Ushtria ruse deklaroi se forcat e saj goditën prodhuesin ukrainas të çelikut Zaporizhstal në Zaporizhia, kompleksin Interpipe Steel në Dnipro dhe disa fabrika në Krivi Rih, mes tyre kompleksin Northern Iron Ore Beneficiation Works. Agjencia Reuters nuk arriti të verifikojë në mënyrë të pavarur versionet e asnjërës prej palëve.

Bilanci më i rëndë i të plagosurve erdhi nga jugu. Guvernatori i rajonit të Odesës, Oleh Kiper, tha se 37 persona, mes tyre një foshnjë, u plagosën në një varg sulmesh gjatë natës, ndërsa dy të tjerë mbetën të zhdukur. Ministria ruse e Mbrojtjes tha se forcat e saj kanë vijuar goditjet mbi portet ukrainase dhe se në Odesë u godit një anije transporti, të cilën e cilësoi si bartëse mallrash për përdorim ushtarak. Më herët po atë ditë, e njëjta ministri njoftoi se gjatë natës ishin goditur dy anije tregtare në portin e Detit të Zi, Çornomorsk.

Lufta u kthye edhe në drejtim të kundërt. Ushtria ukrainase tha se goditi një nga prodhuesit më të mëdhenj rusë të gomës sintetike në Toljati, në rajonin e Samarës, duke shkaktuar zjarr. Sipas saj, fabrika Toljatikauçuk është e specializuar në prodhimin e gomave sintetike dhe të aditivëve që përdoren në karburantin e raketave ruse. Guvernatori rus i rajonit të Samarës, Vjaçeslav Fedorishçev, tha se objekte industriale në rajon ishin sulmuar nga dronë ukrainas, pa saktësuar cilat ishin ato dhe nëse kishin pësuar dëme. Kryetari i bashkisë së Toljatit, Ilja Sukhikh, tha se u dëmtuan disa ndërtesa banimi dhe se një person u plagos.

Në një sulm të veçantë, katër objekte tregtare morën flakë në qytetin e Taganrogut, në rajonin e Rostovit, sipas kryetares së bashkisë, Svetlana Kambulova.

Bilanci i viktimave civile në Ukrainë është rritur ndjeshëm gjatë dy muajve të fundit, ndërsa Rusia ka intensifikuar sulmet ndaj centraleve elektrike dhe infrastrukturës tjetër. Nga ana e saj, Ukraina ka goditur objekte energjetike dhe depo në zona të largëta të Rusisë, ndërsa të dyja palët kanë sulmuar anijet e njëra-tjetrës.